Silap pissusia pillugu: Nunatsinni inuusuttut politikerinit tusaaqqusut

Silap pissusiata allanngoriartornerata ernumanartoqarnera akiorniarnissaanillu oqariartuuteqarluni Nuummi GUX-imi ilinniartut tallimanngorpat marsip ulluisa 15-anni atuaratik Amisumi katersuullutik ingerlaaqatigiinniarput. 

Sila pillugu Parisimi isumaqatigiissut nunat siuttuisa malinninnissaat anguniarlugu nunarsuarmi atuartorpassuit tallimanngorpat ingerlaaqatigiissapput. Ingerlaaqatigiinnissarlu nunatsinni, Savalimmiuni Danmarkimilu ingerlanneqassasoq, GUX Nuummeersoq Iluuna Sørensen ilisimatitsivoq.

Nunarsuarmi oqaluttuarisaanermi atuarumajunnaarneq/sulimajunnaarneq FridaysForFuture pillugu suliniaqatigiiffik inuusuttunnguamit Sverigimeersumit aallarnerneqarpoq.

AAMMA ATUARUK Niviarsiaqqap15-nik ukiullip nunarsuarmi aqutsisut naveerpai

Nunat assigiinngitsut naalakkersuinikkut siuttui, silap pissusia pillugu Polenimi Katowicemi ataatsimeersuarneranni Greta Thunbergimit naveerneqarput.

Silap allanngoriartorneranik ilungersuuteqarluni isummaminik nittarsaassisartup, 16-inik ukiullip Greta Thunbergip “Skolstrejk för klimatet”-mik aallarniigaa nunarsuarmioqataasunit ilisimaneqarlualereerpoq.  Gretami atuarani isummaminik nittarsaassisarpoq.

Silap pissusiata allanngoriartornerata akiorniarneqarnissaanut atatillugu iliuuseqanngippallaarnerarlugit Greta Thunbergip nunat tamalaat siuttui Katowicemi ataatsimeersuarneranni siorna naveerpai.

Nuummi akerliussutsimik takutitsineq Amisuni tallimanngornermi marsip tallimaani nal. 10.30 aallartissaaq.

AAMMA ATUARUK Sila pillugu ajornartorsiutivut aqagu nalaassinnaavasi