Inuusuttut Nunavimmiut: Nunassinniit isumassarseqaagut

- Maaniippungut ilinniarniarlungu sunaanersoq Namminersorneruneq Namminersornerlu. Sunaana Namminersorneq sunaava qanorlu anguneqarsinnaava, aallartitat siuttuat Minnie Grey taama oqarpoq.

Jonathan Epoo inuusuttuuvoq siulittaasuullunilu nunatsinni soorlu meeqqat- inuusuttullu kattuffiatut Sorlammi sanilliunneqarsinnaavoq. Oqaluttuarpoq Nuatsinni tikeraarnerminni assut isumassarsiorsimallutik.

- Kalaallit Nunaanniinnerput isumassarsiffigeqaarput ilikkagaqarluarlutalu. Maaniinnitsinni paasisavut Nunavimmut apukkutta atorluarsinnaavavut. Nunavilli maanna inissisimanera eqqarsaatigalugu Kalaallit Nunaat siuarsimanerujussuuvoq, Nuummiinnerpullu nuannareqaarput, Jonathan Epoo, Saputiit Youth Association of Nunavimmi siuttoq oqarpoq.

Nunatsinni Namminersornerulerneq eqqunneqarpoq 1979-mi suliluunniit Inuit Nunavimmi namminersornerulinngillat.
Canadami nunap immikkoortuvata ilaani aprilimi namminersulivinnissamut qinersisoqarpoq, qinersinermilu amerlanerussuteqartut naameerlutik qinersipput. Naameertut isumaqatigiissut akuerinngilaat kissaatigigamikku suli annerusumik namminersornerulernissaq.

Kisianni Jonathan Epoop Nunavimmi siunissaq neriuuteqarluarfingilluarpaa:

- Naggueqatigiit Inunneerpugut, kattukkuttalu nukitunerussaagut, anguniakkavullu takorluukkavullu piviusunngortissinnaasarlutigit. Takorluukkavulli piviusunngussappata avataaniit sunnertinnaveersaartariaqarpugut. Allat piumasaat nakkaannarfigissanngilagut. Taamaamat Nunavimmi ullutsinni inuusuttuuneq pikkunaqaaq, Jonathan Epoo oqarpoq.

Nunavimmi naggueqatigiit Inuit 75 procentiisa missaat suli 35-liinikuunngillat. KNR-imi suleqatitta Henriette Rasmussennip Minnie Grey oqaloqatigaa, sapaatiuppallu ualikkut aallakaatitassiaa takinerusoq tusarnaarneqarsinnaavoq nalunaaqutaq 15.45.