Inuusuttut nalunaarusiaat ilumoorunneqarli

-Meeqqat inuusuttuaqqallu oqariartuutigisaasigut nersualaarneqartariaqarput. Oqariartuutit pimoorullugit meeqqanut inuusuttuaqqanullu suliniutissanut piaartumik ilanngunneqartariaqarput, MIPI-mit politikkerinut kaammattuipput.

Meeqqat inuusuttuaqqallu tunniusimalluinnarlutik ataatsimeersuarnerminni ullaamiit unnuup tungaanut sulisarput. Pitsaalluinnassaarlu meeqqat nersualaarneqarpata. Oqariartuutillu pingaartillugit piffissap sivikitsup ingerlanerani meeqqanut inuusuttuaqqanullu suliniutigineqartussanut ilanngunneqartuuppata, Tina Dam Rasmussen, MIPImi immikkoortortaqarfimmi ataqatigiissaarisoq oqarpoq. Meeqqat inuusuttuaqqallu pillugit ilisimasaqarfimmit Nakuusa Youth Forumimi alaatsinaattoqarpoq, ataatsimeersuarnermilu oqariartuutigineqartut suleriaatsillu pillugit nalunaarusiortoqarpoq, inernerilu ukiup naannginnerani naammassineqassapput.

UNICEF Danmarkimi meeqqat inuusuttuaqqallu pillugit pisortap, Anne Mette Friisip oqariartuutit tigussaasutit siunissamullu tikkuussisutut nalilerpai.

Soorlu ilinniartitaaneq isiginiartupilussuuaat, atuarfiit pitsaasuunissaat kissaatigalugit, atuarfimmi avatagiisiigut atugassarititaasut pitsaasut, ilinniaqqinnissamullu periarfissat pitsaasut ujartorneqarput, Ane Mette Friis oqarpoq. Meeqqat inuusuttuaqqallu politikkerinut, angajoqqaanut peqatiminnullu pitsaasumik inuuneqarnissamut malitassanik oqariartuuteqarput. Inersimasullu akisussaaffimmik tigusinissaat kaammattuutigaat.

- Oqariartuutini maluginiakkama ilagaat una, tassa meeqqat kissaatigaat inersimasut ersarissumik killiliisarnissaat. Meeqqat perorsarneqarusupput. Soorlu pujortartalinnginnissaq pillugu oqaaqqissaarneqarusupput, Anne Mette Friis oqarpoq.

Meeqqat inuusuttuaqqallu atornerlunneqarsimasut ikiorserneqajaartarnissaat, meeqqat inuusuttuaqqallu oqariartuutigigaat MIPImit maluginiarneqarpoq.

- Inuusuttuaqqanit pingaartinneqartoq una maluginiarpara, saaffigineqarsinnaasunik periarfissaqarnissaq, ajornartorsiutinut ikiorsiisinnaasunik periarfissaqarnissaq. Inuusuttuaqqammi ilisimavaat, atornerlunneqarsimasut imaaliallaannaq maanna ikiorserneqarsinnaanngitsut, Tina Dam Rasmussen oqarpoq. Taanna isumqarpoq, ataatsimeersuarneq tamaat isigalugu pitsaasumik ingerlasimasoq, meeqqallu oqariartuutiminnik anngussisinnaasimasut. UNICEF Danmarkimit ataatsimeersuarneq iluatsittumik nalilerneqarpoq.

- Meeqqat ataatsimoortinneqarsinnaanertik nuannarivaat, politikerinut oqariartuutigiumasatik annguppaat, apersuipput, Nittartakkami Facebookimi quppersagaliorput, siunertat arlallit anguaat, Anne Mette Friis oqarpoq.

UNICEF Danmarkip aamma Namminersorlutik oqartussat suleqatigiinnerat ukunit sisamani tulliuttuni suli ingerlanneqassaaq.