Inuusuttut innuttaasunut sullissisut
Nunaqarfik Kapisillit nunatsinni illoqarfiit annersaaniit 75 kilometerinit ungasissuseqartoq 70-inik inoqarpoq. Ullunilu makkunani inuusuttut suliniummi 'Timi Asimi' peqataasut nunaqarfimmi novembarip 27-ianiit tallimanngorneq 30-iata tungaanut inuiaqatigiinnut sullississapput. Suliniummi 'Timi Asimi' aallarniisoq ineriartortitsisorlu oqaluttuarpoq:
-Nunaqarfimmi inuunermut peqataanissaq siunertaavoq. Atuartut nunaqarfimmi torersaassapput, atuarfimmi atuartunut sammisassaqartitsissallutik, tuperni tipini kaffisortitsinermut qaaqqusissapput, utoqqaat ikiussavaat pulaarlugillu, aamma innuttaasut illuanni crossfiternissamut qaaqqusisoqassaaq, taama Kim Godtfredsen ilisimatitsivoq.
Timi Asimi inuusuttut siunissami ilinniagaqarnissaannut isumassarsiortitsilluni kaammattuineruvoq. Inuiaqatigiinnut sullissinerup saniatigut inuusuttut allanik aamma sammisassaqartinneqartarput soorlu timi atorneratigut, asimiinnermi aamma aturtinneqarnikkut. Sammisassaqartitsinerit atuartitsinerillu inuusuttut inuunermut ajunnginnerusumut nuannernerusumullu aqqutissiuussisussatut takorloorneqarpoq. Inuusuttut inuunertik sumut atorusunnerlugu siunissarlu qanoq ittoq siunertarinerlugu suliniutip ingerlanneqarnerani paasissagaat sulissutigineqartarluni.
Suliniummi 'Timi Asimi' siunertarisaasa ilagaat inuusuttut misigisimasaat misigissusaallu sammineqarnissaat:
-Inuusuttut periarfissinneqartarput inuunerminni misigisatit amerlasuut annilaarnartut itisuumik oqaluttuarinissaannut, kingunerlutsitsinerit assigiinngitsut imaluuniit angajoqqaat pillugit ajornartorsiutit, atornerluinerit, allallu misigisat artornartut soorlu meeqqat atuarfiini ajorsarnerit, taama Kim Godtfredsen ilisimatitsivoq.
Timi Asimi 2011-imi aallartinneqarpoq massakkumullu eqimattat pingajussaat sammisassaqartitsilluni suliniummi peqataallutik naammassilerput. Namminersorlutik Oqartussat aamma Kommuneqarfik Sermersooq 'Timi Asimi' aningaasalersorpaat.
