Inuusuttut inissiarsuit kusassarpaat
Suliniummi inuusuttuaqqat aqqaneq marlunniit 16-inut ukiullit aammali ukioqqortunerulaartut peqataasinnaatillugit neqeroortoqarpoq. Inissiaatileqatigiiffiup Inip ilungersuutigisimavaa Narsarsuarmi inuusuttuaqqat peqataatinnissaat inuusuttuaqqallu unnukkut suliarisarsimasaat qaammat aallartippat saqqummersinneqassapput.
Eqqumiitsuliat ullumi inissiarsuit qulit isuinut nivinngaatiterneqarput saneqquasunit eqqissilluni qimerloorneqarsinnaanngorlugit. Eqqumiitsuliaat assigiinngiiaarput tassanilu takuneqarsinnaavoq inuusuttuaqqat suliarinnittuusut qanoq assigiinngiiaartiginerat.
Sanasoq Nikolaj Ezekiassen neqeroorsimavoq eqqumiitsuliat akeqanngitsumik nivinngaassorniarlugit. Ullumikkullu ulloq naallugu tamanna suliaraa maannalu eqqumiitsuliat blok 1, 2 aamma 3-mi takussaalereerput.