Inuusuttut Inatsisartui: Inuusuttut suliffissaaleqineri Oqartussanit malinnaavigineqarnerusariaqarput

Tassani sammineqartunut ilaavoq, nuttarsinnaanermut tapiissuteqarnissamut periarfissat pioreersut pillugit paasititsiniaanissamut suliniuteqarnissamik siunnersuut taamatullu inuusuttut suliffissarsiornerminni suliffissanik narrusut, inuiaqatigiinni kiffartuussisalernissaat piumasaqaataassasoq siunnersuutigalugu.

Inuusuttut nuttarlutik suliffissarsiortarnissaat pillugu, 2015-imi Inuusuttut Inatsisartuini peqataasoq, Qeqertarsuarmiu 20-nik ukiulik, Hansigne Broberg siullermik ima oqarpoq.

- Inuusuttut suliffissaaleqinerannut annikillisaaqataasinnaavoq, inuusuttut sumiiffimminni periarfissaqanngitsutut misigisimasut, nunaqarfinnut illoqarfinnullu allanut aningaasatigut taperneqarlutik suliartortinneqartarpata tamanna inuusuttut suliffissaaleqinerannut apparsaataasinnaagaluarpoq, Hansigne Broberg oqarpoq.

Suliffissaqarniaraanni nuttarneq periarfissaavoq.

Hansigne Broberg nangilluni oqarpoq, nuttarsinnaanermut periarfissaq qangali atuuttoq, iluatsittutullu oqaatigineqarsinnaanngitsoq pillugu inuusuttunut paasititsiniaassutigineqarsinnaasoq taakku pilerilersinneqarnissaat siunertaralugu. Tassungalu ilanngullugu inuusuttut suliffeqalernissaannik sunniiniarnissaq siunertaralugu, ilaatigut suliffinnik misiliineq aqqutigalugu, nuna tamakkerlugu paasisitsiniaanermi meeqqat atuarfianniit aallartittariaqartoq, Hansigne Broberg oqarpoq.

- Taamaalilluni tamanna meeqqat atuarfianni atuartumut aqqutissiueqataasinnaavoq, suliffik pilerigalugu misilitami paasisaqarfiginerunissaanut, Hansigne Broberg oqarpoq.

Oqartussanit inuusuttut malinnaavigineqarnerusariaqarput.

Hansigne Brobergip Inuusuttullu Inatsisartuisa allat aamma kissaatigaat, inuusuttut atuarunnaarneranni taakku oqartussanit malinnaavigineqarluarnissaat pisariaqartoq.

- Tassuuna oqariartuut imaappoq, inuusuttut sumiinneri aamma sunik suliaqarneri oqartussanit ilisimaneqartannginneri pinngitsoortinniarlugu piaartumik ataavartumillu malinnaavigineqartarnissaat piumasaralutigu.

2015-imi Inuusuttut Inatsisartuini peqataasoq, Qeqertarsuarmiu 20-nik ukiulik, Hansigne Broberg oqarpoq.

Sulerusunngitsut inuiaqatigiinni kiffartuussissapput.

Inuusuttut Inatsisartuisa aamma oqallisigalugu siunnersuutigaat, inuusuttoq suliffissarsiortoq suliffissarsiornermini pingasoriarluni itigartitsisimaguni, inuiaqatigiinni kiffartuussisalernissaa piumasaqaataalissasoq.