Inuusuttut imminut toquttarnerat Canadami immikkut sammineqalersoq
- Issittormiut inuusuttortaat allanngoriartortoqarneranit assigiinngitsorpassuartigut eqqugaanerpaapput. Peqatigitillugu inuusuttut nutaaliorsinnaanerat, nukittussusaat akiuussinnaassusaallu issittumi tarnikkut peqqissutsimut tunngatillugu pitsanngorsaanissamut aqqutiginiarneqassapput, CIHR taama allappoq.
Katillugit 1 million dollarsit, 5 millioner koruunit, imminut toquttarneq pillugu ilisimatusarluni suliniutinut sisamat missaanniittunut atorneqassapput.
Taamatut suliniuteqarneq Issittumi Siunnersuisoqatigiit piujuaannartitsinissamik tunngaveqarluni ineriartortitsinissaq pillugu suleqatigiissitaanit aallartinneqarsimavoq. Siunnersuuteqartullu tassaapput Canada, Danmark/Nunarput/Savalimmiut, Norge aamma USA kiisalu siunnersuisoqatigiinni aalajangersimasumik ilaasortaasut. Ilisimatusarnermik suliniutit issittumi naalagaaffinnut allanut siaruarterneqarnissaat aamma pilersaarutigineqarpoq.
Ilisimatusarluni suliniuteqarneq nunat issittumiittut imminut toquttarnermik pinaveersaartitsinissamik qanoq suliniuteqarsinnaanerinut kaammaattuuteqarnermik naggaserneqassaaq. Suliniutit marsip qaammataani aallartinneqarnissaat naatsorsuutigineqarpoq.
