ALLATTA 2018 Inuusuttut atuakkiortunngorusuttut ujartorneqartut

Ungasissorsuunngitsukkut oqaluttuaraarput Nunatta Isiginnaartitsisarfiata isiginnaartitsisartunngornianut ilinniarfiata inuusuttut piukkunnartut januarip tallimaat tikitsinnagu qinnuteqarnissaannik kaammattorai.

Maannalu atuakkanik saqqummersitsisarfiup Milik Publishingip, nunat avannarliit piorsarsimassutsikkut attaveqaataasup NAPA-p kiisalu Nunatta Atugaateqarfiata suleqatigiillutik inuusuttut atuakkiornermik soqutigisallit saaffigivai.

Pineqartoq tassaavoq ALLATTA, pingajussaa ingerlanneqartussanngortoq, siusinnerusukkullu aaqqissuunneqartarneratigut atuakkiortut nutaat saqqummersitseqqaarnissaminnut aqqutigisarsimasaat. Taakku ilagaat Niviaq Korneliussen, Sørine Steenholdt, Pivinnguaq Mørch aamma Maasi Brøns Chemnitz.

Allannermut unammisitsinermi ALLATTA 2018-imi saaffigineqarput inuusuttut 15-it 30-illu akornanni ukiullit. Oqaluttuatsialaap qanoq ittuusinnaaneranik siunnersuutit nassiunneqarsinnaapput uunga: allatta2018@napa.gl

Periarfissaq kingulleq tassaavoq januarip tallimaat.

AAMMA ATUARUK Nunatta Isiginnaartitsisarfia isiginnaartitsinermik ilinniartussarsiorpoq