Nunatta Isiginnaartitsisarfia isiginnaartitsinermik ilinniartussarsiorpoq
Nunatta Isiginnaartitsisarfiata isiginnaartitsinermik ilinniarfia ilinniartussarsiorpoq. Ilinniartunik aappaagu aasaanerani atuanngiffeqarnerup kingorna aallartitsisoqassaaq.
Isiginnaartitsartunngorniarluni qinnuteqarniariaanni 18-ileereersimasariaqarpoq.
Qinnuteqaammik tunniussinerup saniatigut videomik pingasunik imaqartumik minutsinillu qulinik sivisussuseqartumik nassiussinissaq piumasaqaataavoq.
Immiussami imminut ilisaritissaatit erinarsuummillu nammineq toqqakkannik atugaqassallutit. Taavalu aamma misilitsissaatit.
Qinnuteqaat kingusinnerpaamik januaarip ulluisa tallimaanni nalunaaqutaq ulloqeqqanut tunniunneqassaaq.
Isiginnaartitsisartunngorniarnissamik eqqarsaatersuuteqaraanni paasissutissat sukumiinerusut Nunatta Isiginnaartitsisarfiata Facebookikkut quppersagaani takuniarneqarsinnaapput.
