Inuusuttunut pinerluuteqarsimasunut isumannaallissakkamik inissiisarfimmik Mimi Karlsen pilersitsiniarpoq
Arnaq 17-nik ukiulik toqutsisimasutut pasisatut Aasianni pineqaatissinneqarsimasunut inissiisarfimmiitinneqartoq sapaammi imminut toqussimasoq sulisunit siumorneqarpoq.
- Pisoq alianarluinnarpoq akuersaarneqarsinnaanngilluinnarlunilu, ilaqutaasunuinnaanngitsoq aammali Nunatsinnut tamanut pisoq alianartuuvoq, Mimi Karlsen oqarpoq.
Illersuisut peqatigiiffiata Qaasuisup Kommuniata inuusuttuaqqanut sullitassatut naammassinnissimannginnera isornartorsiorneqarpoq. Pinerluuteqarsimasunummi inissiigallartarfeqanngilaq. Kommuunillu isummaginninnermut pisortaata oqarnera naapertorlugu Namminersorlutik Oqartussat inissiigallarnissamut akisussaaffeqarnerarneqarpoq. Mimi Karlsenillu tamatumunnga akisussaatinneqarnini nassuerutigaa.
- Ilumoorpoq, suliassaqarfimmi matumani akisussaanera, taamaattoq inatsisitigut inissitassat suli naammassineqanngillat, tamatumalu kinguneranik matoqqasunik inissiivissaqartitsisoqarani. Inuusuttuaqqamut suliaq suliarineqalermat Ilaqutariinnermut Naalakkersuisoqarfiup inissiigallarnissamut kommuunimut neqeroorsimanerigaluarnera erseqqissaatigineqarpoq, tamannali qisuariarfigineqarsimanngilaq kingornali neqeroorut suli ajortoqanngikkallarmat kommuunimit kissaatiginartinneqarsimagaluarluni.
Pisoq nuanniitsuuvoq, inatsisitigulli suli amigartoqarmat erseqqissaatigalugu.
- Pissutsit taamaattut isornartorsiorneqartut eqqortuupput, ajornartorsiutimmi aaqqiivigisinnaasimannginnatsigu ajorluinnarpoq. Siunertamulli pinasuartumik inatsisiliornissamut sinaakkusersuinissamullu periarfissaqanngilaq, eqqaamasariaqarporli politiit, eqqartuussiveqarfiit uagullu oqartussat ajornartorsiutip aaqqiiviginissaanut suleqatigiittariaqaratta, Mimi Karlsen erseqqissaavoq.
Mimi Karlsenip parteeqataata Nikoline Ziemerip pisortanut isornartorsiuinera atatillugu inuit pisinnaatitaaffii pillugit siuinnersuisoqatigiiffimmit suliaq suliarineqartariaqarsoraa.
Politimestereqarfik naapertorlugu ukiukitsut arfinillit arfineq-marlullu missaanniittut pinerluuteqarsimasunut ukiumut inissiisarfimmiitinneqartarput.