Inuusuttunut eqqumiitsuliortunut neqeroorutitsialak
Inuusuttut festivalernerannut, Nordens Lysimut (Avannaata Qaamarnga) Finlandimi aappaagu pisussamut akeqanngitsumik angalasoqarnissaa peqataasoqarnissaalu neqeroorutigineqarput.
Nunanit Avannarlernit peqataasussanik 75-inik toqqaasoqassaaq, taakkulu eqqumiitsulioriaatsinut tallimanut avinneqassapput (nipilersorneq, isiginnaartitsineq, assilissanik eqqumiitsuliorneq qitinnerlu). Taamaaliortoqareerpallu eqimattakkuutaat Nunani Avannarlerni angalatinneqassapput. Eqqumiitsuliortullu inuusuttut Finlandimi Joensuumi naggataatigut naapitinneqassapput, ataatsimoorlutillu ulloq ataaseq takutitsinissamik angisuumik suleqatigiissinneqassallutik.
Ilulissat festivalip nipilersortartuinit siulliullugit tikeraarneqassapput, ilaatigullu qilaatip rytmia atorlugu qilaammik nipilersuusiortoqassalluni. Nipilersortartut Ilulissaneeriarlutik Reykjavikiliassapput, nipilersuutinik nutaaliaasunik elektroniskiusunik tassani sammisaqassallutik, nipilersortullu angalanermik naggataani Finlandip avannaani finlandimiut joikertarnerannik aamma sammisaqartinneqassapput.
Inuusuttut 14-init 17-inut ukiullit Nordisk Lys Festivalimut peqataanissamik oktobarip ulluisa 20-iata tungaanut qinnuteqarsinnaapput. Tamanna festivalip nittartagaatigut pissaaq, oqaatsillu nittartakkami atorneqartut arlaat atorlugit qinnuteqartoqarsinnaavoq: Nordiclight2014.com.
