Inuusuttuaraq isumalluarfigaat
Qatanngutigiit imminnut sukasarlutik unammisarsimanerat Arctic Winter Games-eqarnissaani kalaallit ujaminnannerannik kinguneqarataannaavoq.
Tassaapput qatanngutigiit Salik Olsen aamma Aka Olsen Sisimiuneersut, tamarmillu Arctic Winter Games-imut peqataasussanngorput. Immikkut akuersisoqarneratigut 13-iinnarnik ukiulik Aka Olsen peqataasussanngorpoq. GIFip malittarisassai malillugit suli meeraavallaaraluarpoq peqataanissaminut.
- Kisianni Aka Olsenip angajuni unammersuartarsimagunarpaa taamaasillunilu maanna pikkorisseriivissimalluni, nuna tamakkerlugu sungiusaasoq Erik Amondsen KNR-imut oqarpoq.
1990-ikkut ingerlaneranni nukarlerni kalaallit Arctic Winter Games-imi ujamminnattarsimapput. Timersoqatigiiffiilli kattuffiata peqataanissamut malittarisassat 1990-ikkut naalerneranni allanngortippai aatsaat 14-ileereersimasut peqataasinnaatilerlugit. Taama aalajangertoqarpoq timersortartuaqqat siusippallaamik "qaarsillannginnginnissaat" piniarlugu.
- Kisianni tassa Aka Olsen eqqarsaatigalugu immikkut akuersisoqarnissaa qinnutigisimavarput isumaqaratta ujaminnannissaminut periarfissaqartoq, Erik Amondsen oqarpoq.
Kingullermik Arctic Winter Games-eqarneranni sisoraatinik oqilaniunnermmi kalaallit ujamminnanngillat. Unammersuarnerni taakkunani Saamit aamma Ruslandip ilaani Yamal-imeersut pisassaanngivipput.
- Aamma peqataatitassatta ilaat maanna Norgep avannaani Nordreise-mi najugaqarput. Niviarsissat immaqa iligiiaarnermi ujaminnannissamut periarfissaqarsinnaapput, Erik Amondsen oqarpoq.
Arctic Winter Games-eriartussat tassaapput:
Angutitsiaq Lynge
Johannes Olsvig
Pipaluk Kristensen
Camilla Lynge Hansen
Amalie Bourup
Salik Olsen
Nukappiannguaq Olsen
Pakkutaq Hansen
Nunni Petersen
Ninni Jeremiassen
Malou Platou Johansen
Aka Olsen