Inuusuttorpassuit ilinniartitaanermi annaaneqartarput

Inuusuttuaqqat 16-nit 18-nut ukiullit 30 procentii meeqqat atuarfianni atuarnertik naammassinagu atuarunnaartarput ilinnikkamilluunniit aallartitsissanatik. Amerlavallaarput Aningaasaqarnermut Naalakkersuisoq Maliina Abelsen radiaviisimut oqarpoq. Nuummi Piareersarfimmi atuartunut siunnersortip Emma Ludvigsen Larsen-ip Maliina Abelsen isumaqatigaa.
Allattoq Jaaku Lyberth
septembarip 20-at 2012 12:17

- Amerlavallaaqaat uniinnartartut. Meeqqat atuarfianni atuartut 2008-imi atuarfimmit anisut ukioqatigiit tulleriit atuarfimmit soraarummeermata, inuusuttut ilinniarfissamik amigaateqartut amerlipput, Emma Ludvigsen Larsen oqarpoq.

- Suliffinnik misiligutitut suliffigineqarsinnaasut amigaatigineqarput inuusuttut ilinniakkamik aallaartitsinissaannut, taamaattumik meeqqat atuarfiat Piareersarfiit suliffeqarfiillu ikioqatigiittariaqarput inuusuttuaqqat ilinniakkamik aallaartitsinissaannut, Nuummi Piareersarfimmi aqutsisoq oqarpoq.

Inuussuttuaqqat meeqqat atuarfiannit naammassimmata ataatsimoorluni suliunitaasussaat amigaataasimanerat pissutaasimasinnaavoq, inuusuttuaqqat taamak amerlatigisut ilinniakkamik aallartitsisimanngimmata, Susanne Møller Nuummi Piareersarfimmi aqutsisoq oqarpoq.

Aamma imaasinnaavoq meeqqat atuarfiannit atuarunnaarnerup nalaani ilinnialernissamut karakterit piumsaqaataasut qaffanneqarsimasimasinnaagaluartut, Susanne Møller oqarpoq.

Inuusuttut meeqqat atuarfiannit atuarunnaarnissaat sioqqullugu Piareersarfiit meeqqat atuarfiat suliffeqarfiillu suleqatigiillutik iliuusissanik aallartitsisariaqartut Susanne Møller isumaqarpoq. Ilaqarpullu ilinnialernissaminnut aallartitsineq ajortunik. Ilaqarput Piareersarfimmit attavigineqarsimanngitsut, taakkuupput meeqqat atuarfiannit atuarunnaarnerminnit Piareersarfinnut saaffiginnissimanngitsut amerlavallaarppullu sulerinerannik ilisimanngisatsinnik taamaattumillu ujartornissaannik iliuuseqarfigisinnaanngisatsinnik Susanne Møller oqarpoq.

Inuusuttut ilinniakkamik ingerlataqanngitsut aallartitsimanngitsulluunniit kaammattoqarneqarput Piareersarfinnut saaffigineqqullugit ilinnialernissaanut iliuussissanik aallartitsisoqarsinnaammat.

Inuusuttut nammineerlutik Piareersarfinnut saaffiginninnissaat Nuummi Piareersarfimmi siunnersortip Emma Ludvigsen Larsenip kaammattuutigaa.

Inuusuttut ilinniakkamik aallartitsimannginnerannut pissutaasut ilagaat suliffinnik misiligutitut suliffigisinnaasut amigaatigineqarmata taakkualu ukiut arlallit suli  amigaatigineqarnissaaat Piareersarfimmit oqaatigineqarpoq.

- Sulliffinnik amerlanerusunik praktikkerfiusinnaasunik pilersitsisoqanngippat, ajornartorsiut ukiut arlaqartut ajornartorsiutigineqassaaq, Emma Ludvigsen Larsen oqarpoq.

Suliffinnik sungiusaatigalugu  suliffigisinnaasat amigaatigineqarnerat anigorniarlugu maanna ilinniarfinni assiigiingitsuni iliuuseqarfiginiarneqarpoq, tassalu inuussutissarsiutitigut ilinniarfinni misiligutitut suliffittut ingerlanneqarsinnaanerat aamma Danmarkimi praktikertoqarsinnaaneq allanilu periarfissat ujartorneqarput, Nuummi Piareersarfimmi aqutsisoq Susanne Møller oqarpoq.

Kalaallit Nunaanni  suliffeqarfiit amerliartorlutik siumut ingerlanerata naliginngilaa taamaatumillu suliffissat amerliartunngillat, Susanne Mølller oqarpoq.

Inuusuttut 94/95/96-imilu inuusut 2.511-iupput. Taakunannga 800-ut ilinniakkammik aallartitsimanngillat, tassalu inuusuttut 16-nit 18-nut ukioqartu 32 procentii ilinniakkamik ingerlataqanngillat.

Nuumi Piareersarfimmi ilinniartunik 70nik inissaqarpoq, maannakkullu Piareersarfimmi atuartut 110-pput.