Inuusuit kalaallisut atuartinneqarusupput
Nunatsinni kalaallisut ilinniartitsisoqassaaq, taama Doris Jacobsen Jensen isumaqarpoq, taannami isumaqarpoq nunami maani kalaallisut ilinniartitsisoqarnerusariaqartoq.
- Amerlavallaat meeqqat atuarfianiit anisarput eksamenersimanatik, taamaalillutillu ilinniartitaanerup iluanut pulanngitsoortarput, tamanna arlalinnik nassuiaasersorneqarsinnaavoq, tamatumunngalu nassuiaatit ilagaat, ilinniartitaaneq qallunaatut tuluttullu ingerlavallaarmat, taanna KNR-mut oqarpoq.
AAMMA ATUARUK Siumup siunnersuutaa: Kalaallisut oqaluttunik qanoq ililluta ilinniartitsisoqarnerulissaagut
Naalakkersuisut siunnersuummut tapersiipput, tamannalu pillugu itinerusumik misissuisoqarnissaa ornigaat.
Inuusuit: Kalaallisut ilinniartitsisoqarli
Campus Kujallermi ilinniartut kalaallisut ilinniartitsisoqarnerunissaanut amerlanerit isumaqataapput.
Taakku ilagaat 3.G-mi ilinniartoq Tony Hansen:
- Isumaqataavunga, kalaallisut ilinniartitsisut amerlanerutikkusuppakka, Aasiannilu GU.rama kalaallisut atuartitaagaangatta aatsaat kalaallisut ilinniartinneqartarpugut, oqarpoq.
3.G-mi ilinniartoq Ane Marie Enoksen aamma tamatumunnga tapersiivoq:
- Aallarteqqaarama qallunaatut naluneruvunga, qallunaanillu ilinniartitsisoqartangaaratta maanna qallunaatut oqalunneq sungiuppara, Ane Marie Enoksen oqarpoq.
Capus Kujallermi ilinniartitsisut katillugit 35-ipput taakkunanngalu tallimat kisimik kalaallisut oqaaseqarput.
Ilinniartulli aamma ilaqarput qallunaatuinnaq ilinniartinneqarnermut iluarinnittunik:
- Uanga qallunaatut paasinerusarama qallunaatut oqaasilinnik ilinniartitsineq ajorinnginneruara, Brønlund Lund oqarpoq.
Qallunaatuinnaq ingerlaneq ilinniartunut unitsitsisarpoq
Ilitsoqqussaralugu oqaatsit atornagit ilinniarititsineq akornutaasinnasartoq Campus Kujallermi ilinniartut isumaqarput.
- Amerlanerpaat efterskolersimanngitsut toqqaannaq GU-mut isertut ilungersortannguatsiaqaat, qallunaatummi paasinnillunilu oqalulluarsinnaanissaq amigaataasarpoq, taamaammat kalaallisut oqaluttunik ilinniartitsisoqarnerunissaq kissaatiginarpoq, Tony Hansen oqarpoq.
Taamatuttaaq Ane Marie Enoksen kalaallisut ilinniartitsisoqarnerunissaanik isumaqataavoq:
- Qallunaatut pikkorippallaanngitsunut iluartorujussuussaaq imminut taava inorsissanngillat, ilikkagassanimi kalaallisut ilinniarunigit aamma ilikkagaqarnerussaaq, oqarpoq.
Tamatuma misissuiffigineqarnissaanik siunnersuut aappaagu ukiakkut Inatsisartut ataatsimiilerpata qaqinneqassasoq naatsorsuutigigitsik, Ilinniartitaanermut naalakkersuisoq Peter Olsen KNR-mut akissuteqarluni oqarpoq.