Inuussutissarsiutitigut ilinniarneqarsinnaasut sivikitsut pilersinniarneqalerput
Tamanna ilaatigut Ilinniartitsinermut Pilersaarut II-mi attuumassuteqartunut maanna tusarniaassutigineqartumi ilaatigut atuarneqarsinnaavoq.
Ukioq ataaseq kiisalu ukiut marluk ilinniarneqarsinnaasut pilersinneqarnissaat uani eqqarsaataapput, pineqartut tassaapput sanaartornermi ikkussuinermi teknikeri, avatangiisinut teknikeri, marrianik qarmaasoq, entreprenørmekanikeri, sanaartornermi teknikeri, bygningsstruktøri kiisalu ingutserisunngorniarneq.
Ilinniarneqarsinnaasut taakku naammassigaanni ilinniartitaanernut sivisunernut isersinnaanngornissaat siunniunneqarpoq. Suliffeqarfiit ilinniarsimasunik amigaateqarnertik peqqutigalugu ilinniartitaanernik taakkuninnga pilersitsisoqarsinnaanissaa kissaatigisimavaat.
Ilinniarneqarsinnaasut pineqartut aallartikkumallugit Kalaallit Nunaanni Teknikkimik Ilinniarfik KTI aningaasassarsiorluni aallartereersimavoq, aallartitsinissamullu init atuartitsivissat kisimik amigaataapput, taamaattumillu KTI-p uiguneqarnissaa pilersaarutit piviusunngortinneqassappata pisariaqarpoq. Ilinniarfeqarfiit Danmarkimiittut aamma suleqatigineqalereerput.
Naalakkersuisut tusarniaanerat februaarip 18-ianut killeqarpoq.