Inuussutissarsiutit qineqqusaarutigineqarnerupput
Namminersulernissamut tunngasut kommunellu kattunnissaat nunaqarfinni aqutsisunut qineqqusaartut oqallisigivallaartorsuunngilaat, annerusumilli inuussutissarsiutitigut ineriartortitseqqinnissaq sammineqartarput.
Kommunit allanngortiteriffigineqarlutik immaqalu kattunneqarlutik ukioq 2009-mit ingerlalernissaat aamma namminersulivinnissamut tunngasut nuna tamakkerlugu qinikkanit ullumikkut oqallisigineqarluartarput.
Tamakkununngali tunngasut nunaqarfinni aqutsisunut ullumikkut qinigassanngortittut oqallisigisorsuunngilaat, annerusumilli ullumikkut pissutsit oqaluuseriumanerusarlugit.
Soorlu tamanna aamma assersuutigalugu Kangerlussuarmi qineqqusaartut qineqqusaarutaanni atuarneqarsinnaasut. Peqqinnissaq, atuarfeqarneq, ilinniartitsisussaaleqineq, nioqqutissanik assartuineq ilaasartaatillu tikittarnerat sammilluarneqarput.
- Ulluinnarni inuunitsinnut qanilaarnerusut, soorlu inuussutissarsiutinik siuarsaanissaq qineqqusaarutigiumaneqarnerusartut maluginiarpara. Nunaqarfiit Peqatigiiffianni siulittaasoq Karl Tobiassen erseqqissaavoq.