Inuussutissarsiutinik siuarsaasut kattuttussanngorput

Inuussutissarsiutinik inerisaanerup qanoq aaqqissuunneqarnissaa kingusinnerpaamik januaarip aallaqqaataani 2011-mi paasinarsissaaq.

Suliffeqarfiit kattunneqarnissaat inuussutissarsiortunut iluaqutaassasoq

Nunatsinni Takornariaqarnermik Inussutissarsiutillu pillugit Siunnersuisoqatigiit siulittaasuat Bjarne Eklund isumaqarpoq.

Nunatsinni Takornariaqarnermik Inuusutissarsiutillu pillugit Siunnersuisoqatigiit, Greenland Venture, inuussutissarsiutinut aningaasaliisarfik aammalu suliffeqarfik Greenland Development, Aluminiumik aatsitsiviliornissamik suliniuteqartoq, kattuttussaapput.

Bjarne Eklund neriuppoq, taakkua pingasut piginnaasaat ajunnginnerpaat atorlugit kattunneqassasut.

Suliffeqarfiit inuussutissarsiutit siuarsarneqarnissannik suliaqartut kattutsinneqarnissaat, Greenland Venturep juunip ulluisa 20-anni ataatsimeersuarnerani Naalakkersuisut saqqummiuppaat.

Inuussutissarsiuteqartut siunnersorneqarnissaminnik pisariaqartitsisut saaffissaat ataasiulerpat, tamanut pisariinnerulissasoq, Bjarne Eklundip tikkuarpaa.

- Suliatta assigiiaarneri pissutigalugit ajornartorsiuteqarsinnaavugut. Sulisut ilaat naliliisarput ilaallu tapiisarlutik, uagullu annermik ilisimasanik tunniussaqartartuulluta. Tassalu siunissami kina sunik suliaqassanersoq erseqqissarneqartariaqarpoq, Bjarne Eklund oqarpoq.

Suliffeqarfiit pingasut suli kattutinngillat, sulisut ippassaq suliatik ullumi aamma suliaralugit.

- Sulisut ullut tamaasa suliatik naammassisinnaniassammatigit eqqissisimatinnissaat pingaartupilussuuvoq. Tamaammallu aamma

inuussutissarsiutinut naalakkersuisoqarfillu isumaqatigiissutigaarput, allamik tusagaqartinnata pisarnertut suliinnassasugut, Bjarne Eklund oqarpoq.

Nunatsinni Takornariaqarnermik Inuussutissarsiutillu pillugit Siunnersuisoqatigiit siulittasuata Bjarne Eklundip annerusumik suliarai takornariaqarnerup inuussutissarsiutillu nittarsaanneqarnerat.

Greenland Venture inuussutissarsiuteqartunut aningaasaaliisartuulluni.

Greenland Development suliffeqarfiuvoq aluminiumimik aatsitsiviliorniarnermi pilersaarummut aaqqissuusisoqarfittut atuulluni.