Inuuna: Pingasunik guldinnappunga sølverlu ataaseq

Inuuna Olsvig, Sverigemi januaarip 29-aniit februaarip aappaanut DM-imi unammeqataavoq. Taanna sisamarilarluni unamminermini pingasunik guldinnappoq ataatsimillu sølvinnalluni.

DM tassaavoq danskit kalaallillu ujakkarnermi Sverigemi pissartanngorniunnerat.

Inuuna arfineq pingasunik ukioqarpoq aatsaallu siullerpaamik anaanani qimallugu angalavoq, tamanna anaanaata Miiannguaq Olsvigip ima oqaluttuaraa.

- Siullermik novembarimili paasivarput ilaseritittoq, aallaqataarusukkuni ilagineqarsinnaasoq nsp-qatimininngaanniit. Taamanili paasigamiulli qilanaalerpoq, kisianni nipaarsaarunnikuuarput uneqinammat tassami kisimiilluni aallaqqaatigisussaammagu.

- Kisianni nuannaarluni aallarpoq, Miannguaq Olsvig oqarpoq.

Inuuna unamminera siuleq 1,4 kilometerisut isorartutigisoq unammigamiuk guldinnappoq. Tassani meeqqat qulit unammeqatigivai. Ulloq aappassaani 2,3 kilometerisut isorartutigisumik unamminermi aamma guldinnappoq, pingajuattut 400 meterisut isorartutigisumik unamminermi aamma guldinnaqqippoq.

Taamatummita misigisaqarneq Inuuna Olsvigip qanoq igivaa?

- Ajunngilaq nuannerpoq. Sverigi nuannerpoq, silagillunilu anorlerpiartanngilaq aamma siallilaartarluni, apu soorlu qiniliaq.

Sisorarfigalugu qanoq ippa?

- Iluaalaarpoq kisianni ajunngilaq.

Tullissaani angalaqataaqqinnissarnut aperineqassagaluaruit piumaqqissavit?

- Aap, sisorarlunga piareersassaanga sungiusarlunga, Inuuna Olsvig oqarpoq.

Nunatsinniit DM-imut unammiartut katillutik 40-pput taakku klubbinit ukunaneersuupput ASP - Aasianni sisorartartut peqatigiiffiat, SSP - Sisimiuni sisorartatut peqatigiffiat,  NUP - Nuummi ujakkaartartut peqatigiiffiat, kiisalu NSP - Nuummi sisorartartut peqatigiiffiat.

Inuuna Olsvig NSP-miit angalaqataavoq. Meeqqalli NSP-miit angalaniartut minnerpaamik aqqaneq marluleereersimasussaagaluartut, Inuuna, immikkut akuerisaasoq, anaanaasoq oqarluttuarpoq, anaanaasullu peqataannginnini inornartilaarpaa.

-  Unamminerisa nalaani toqqaannartumik tv-kkut malinnaatinneqannginnatta kisianni chippeq niuannut ikkullugu nittartakkakkut malinnaasoqarsinnaagami, tassuuna malinnaasarpunga apuukkaangallu ingerlaannaq oqaluussinnaasarnagu, inorsarnalaarluni.

- Kisianni tutsiukkaangami nuannertarluni, nuannarluni ilaannikkut maqaasilaartaraluarluni kisianni angalanini nukittorsaatigisimassagaa ilimagivara.