Inuulluaqqusineq

Inger Bruun inuunermini sulinermi annersaani Kalaallit Illutaanni sulivoq - aallaqqaammut siunnersuisarfimmi ningiuuvoq, taava pisortap tullersortaatut atorfeqarpoq 1997-imiillu pisortatut atorfeqarluni. Katillugit ukiut 40-t suliffigaa.

Inger Bruun oqalugiarnermini inuit assigiissutaat, assigiinngissutsimilu assigiissuteqarnerup nassuerutigineqarnissaa ilaatigut iserfigaa.

- Inuttut pisuunnguallaatigisannik maani illumi ilikkagarpassuaqarpunga. Illarneq ilikkarpara, qamanngaanneersumik, aamma nunarsuarmi suminngaanneeraluaruttaluunniit aliasunnermi ataatsimoorsinnaanerput ilikkarpara. Inuup misigissusivii eqqarsaatigalutik, taakku tamatta iluatsinni pigaagut, tassanerpiarlumiuna assigiissuteqartugut, oqarpoq.

Pisortaanermini suliassat iluatsinngitsoorsimasani aamma eqqaavai.

- Ukiuni 40-ni atorfeqarninni naalliuutigiuaannarsimasara tassaavoq, inuit Danmarkimi Herstedvesterimut Risskovimullu aallartinneqartarnerat. Danskit oqartussaasut pimoorussillutik nunama pillakkanik aallartitsisarfittut atorunnaarsitsinissaq sulissutigisimanngilaat.

Inger Bruunip suliniutaasa kingulliit ilagaat, kalaallit ilinniartut Københavnimi ineqarfiliuunneqarnissaasa qulakkeerneqarnissaa. Isumaqatigiissutip inaarutaasumik suli atsiorneqarsimannginnera ajuusaarutigaa, isumaqatigiissutilli aasannginnerani naammassineqarnissaa neriunartoqartillugu.

Inger Bruunip taartissaa, Leise Johnsen, maanna Napami pisortaasoq, septembarip aallaqqaataani aallartissaaq. Inger Bruun tallimanngorpat tulliani naggataarluni sulissaaq.