Inussutoqqami taqussat nutaat
Graah-p inussuliaa aggustimi 1829-mili sananeqartoq alapernaarsuut VÆDDEREN-imi aquttuunerup Niels Pind-ip sapaatit akunnerani kingullermi alakkartereeraalu tassa inussuup maanna imarilersimasai.
Qallunaat imarsiortuisa sakkutuuini kaptajnløjtnantiusoq Wilhelm August Graah qaammatini pingasuni affarmilu tunup sineriaatigut umiaq atorlugu ilisimasassarsiormat tamaanga killisimavoq.
Qallunaatsiaqarfimmi tusaamasaq "østerbygden" taamani tamaaniissorineqarmat Graah-p nassaariniarsimagaluarpaa. Tunumili qallunaatsianik nassaanngerluinnarpoq. Taamaammat Dannebrog Ø-mi inussulioriarluni kujammut aallarpoq, aasamilu 1830-mi kujataani inoqarfiusunut apuulluni.
Ukiut 182-it qaangiuttullu Graah-p inussuliaata misissorneqarnissaa assiliortorneqarnissaalu Vædderen-ermiunut suliakkiunneqarpoq, Grønlands Kommandop nittartagaani taama allaaserineqarpoq. Alapernaarsuutip qulimiguulia atorlugu ujaasisoqareersorlu qeqertap avannamut kangiatungaani qattorngup qaavani inussuliaq nassaarineqarpoq.
- Inussuliaq assiliortorneqarpoq, eqqoqqissaartumik sumiissusersineqariarluni Vædderenermiut qillertuusat Jaka-bov-it marluk, Mariekiksit poortaq ataaseq, vodka puiaasaq kiisalu allakkiamerngit inussuup iluanut ilivaat. Aquttuuneq Niels Pind taama oqaluttuarpoq.
Vædderenermiut minutsit 30-iinnaat timmereerlutillu alapernaarsuummut uterput. Tassalu Wilhelm August Graah-p qaammatit pingasut affarlu atorlugit 1830-mi ilungersorluni kujammut ingerlaarfigisimasaanut Vædderenermiut apuullutik.