Kongressip inussiaateqarunnaarnermut ulloqartitsinissaq akuerigaa

Ullup juunip 19-iata USA-mi illernartuutinneqartalernissaanik inatsisissatut siunnersuut, Repræsentanternes Husimi amerlanerussuteqartut pingasunngormat akueraat.

Ulloq taanna inussiaatit millionilikkaat iperagaanerat pillugu malunnartitsisoqartalernissaanik siunertaqarpoq.

Repræsentanternes Husimi siunnersuummut taasisut 415-14-iupput.

Kongressip inatsisartuisa aappaasa Senatit akerliusoqarfiunngitsumik akuersereerneratigut tamanna marlunngornermi pivoq.

Præsidentip Joe Bidenimit siunnersuummut atsiornissaa maanna amigaataaginnalerpoq.

Inatsisissatup siunnersuutip ullulerneqarnera arfininngorpaatinnagu pisinnaanersoq suli ilisimaneqanngilaq.

Ulloq juunip ulluisa 19-iat inuiattut illernartuutinneqassasoq

- Juunip ulluisa 19-iata Juneteenthip inuiattut illernartuutinneqartalernissaanut eqqumaffiginninnerulernissaq pissutaavoq, repræsentanternes Husimi ilaasortaq, republikaneri Guy Reschenthaler oqarpoq.

- Taartumik amilinnut, taakkulu kulturiannut kiisalu inussiaateqarunnaarnissamut sorsullutik toqusimasunut nersorniaaneruvoq.

Ulloq juunip ulluisa 19-iat, USA-mi Juneteenthimik taagorneqartoq USA-p amerikamiorpassuarnut inuiattut ulluata aappaattut isigineqassaaq.

AAMMA ATUARUK Angut taartumik amilik politiinit toqutaareersorlu Minnesotamiut aneqqusaajunnaarallartut

Juneteenth oqaasiuvoq tuluit oqaasiini qaammat juuni ullullu 19-ianik katitigaasoq – June aamma Nineteenth. Juunip 19-iat 1865-imi pisimasumut tunngatinneqarpoq, USA-mimi taamani inussiaateqartarunnaarneq nalunaarutigineqarpoq.

Juunip 19-iani 1865-imi inussiaataasut kingulliit ulloq taanna iperagaanerminnik paasitinneqarput.

USA-mi sorsuunnerup nalaani præsident Abraham Lincolnip inussiaatinik aniguisitsilluni suaaruteqareernerata kingorna Texasimi generalip inussiaatit ukiup marluk matuma siornali inussiaataajunnaarsimanerannik paasitippai.

Black Lives Matters pillugu akerliussutimik siornali takutitsisoqareersorlu, demokraatit kongressimi ulloq juunip ulluisa 19-iat illernartuutitassatut siunnersuutigisimagaluarpaat, taakkuli republikanerimit Ron Johnsonimit unitsinneqarsimallutik.

Ron Johnsonip siunnersuut akornutissaqartinnagu marlunngormat nalunaarutigaa, tiimialuillu qaangiutiinnartut siunnersuut senatimit akuerineqarpoq.