Inussat ipaasa inaannik misissuineq kisimi utaqqisaavoq

Angummik 38-nik ukiulimmik toqutsinermut atatillugu Nuummi politiit paasiniaanerat inussat ipaasa inaannik inuullu sananeqaataanut ilisarnaatitut takussutissamik, DNA-mik, nassaarnermik kinguneqarpoq. Misissugassat nassaarineqartut Danmarkimut nasisunneqareersimalerput, akissullu takkuppat toqutsisup kinaassusersineqarnissaa naatsorsuutigineqarpoq.
Allattoq Louise M. Kleemann
oktobarip 20-at 2011 14:07

Angutip aappaa, arnaq 47-nik ukiulik, toqutsisutut pasisaalluni sapaatip akunnerini arfineq-marlunngortuni tigummineqarallartoq, toqutsinermut nammineq pisuunnginnerarpoq.

Angut 38-nik ukiulik  oqqannerup kingorna toqusimasoq Nuummi politiinut septembarip pingajuani nalunaarutigineqarpoq. Angutip aappaa, arnaq 47-nik ukiulik, toqutsisimasutut pasineqarluni politiinit aqagukkut tigusarineqarpoq.

savik toqutsinermut atorneqarsimassangatinneqartoq toqutsiffimmi nassaarineqarpoq, tassanilu inussat ipaasa inaannik DNA-millu nassaarnermit misissuinerup inerneri arnamut 47-nik ukiulimmut uppernarsaatissatut atorneqarsinnaanissaat politiit naatsorsuutigaat.

Nuummi politiineersoq Sten Brink Jørgensen naapertorlugu politiit toqutsinermut atatillugu allanik pasisaqanngillat.

- Misissugassat inerneri takkuppata suliaq eqqartuussivimmut tunniunneqassaaq, aamma ukiunik arfinilinnik sivisussusilimmik pineqaatissinneqarsimasunut inissiisarfimmiittussanngorlugu eqqartuussisoqarnissaa unnerluussisussaatitaasumit piumasarineqassaaq, Sten Brink Jørgensen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq