Inunnik isumaginnittut angajoqqaarsiaasariaqartut
Stina Sværd Kommuneqarfik Sermersuummi inunnik isumaginninnermi sullissisuuvoq. Pinartoqavitsillugulu angajoqqaarsiatut 2005-imiilli ikiuuttarpoq. Meeqqat arlaqaqisut paarsarinikuuai.
-Soorunami meeqqamut toqqissisimananngilaq, pissutigalugu una piffissap ingerlanerani naalungiarsunnguaq attaveqaataa uatsinnut sakkortusiartortussaagami. Tamaattumik nallinnartorujussuuvoq naalungiarsunnguup nooqqinnissaanut, ipararnissaa allanut ilaqutariinut nuutseqqinnissaa, inunnik isumaginninnermi Kommuneqarfik Sermersuumi sullissisoq Stine Sværd KNR-imut taama oqarpoq.
Naalungiarsuk qaammatimik ataatsimik utoqqaassusilik Stiinap ilaqutaasalu paarisarileqqammerpaat. Niviarsiarannguaq Decembarip 21-ani angajoqqaarsiassaarummat Stinap ilaqutaasalu niviarsiarannguaq paarisarilerpaat. Qaquguli angajoqqaarsiavissaminut nuussanersoq nalunarpoq.
- Una qaammatileeqqammerpoq ippassaq. Sisamassaa nuussaaq, uagutsinninngaanniit nuuppat, assut tamanna pinaveersaartikkusunnaqaaq, Stina Sværd oqarpoq.
Nuummiinaq angajoqqaarsiatut nalunaarsorsimasut 71-iupput. Taakkuli naammakkunnaarput.
- Ukiut kingulliit pingasungajaat angajoqqaarsialerisuni sulininni aatsaat taama ajornartorsiut annertutigitillugu misigivara, angajoqqaarsianut Kommuneqarfik Sermersuumi siunersorti Kirstine Knudsen oqarpoq.
Kommuneqarfik Sermersuumi inunnik isumaginnittoqarfimmi ingerlatsisup Ellen Magnussenip ajornartorsiut ima itisiliiffigaa.
- Ajoraluartumik ajuusaarnaqisumillu meerannguit massakkut arfinillit inunngunngittumiit sisamanik ukiulimmut angerlarsimaffiup avataanut inissinneqarsimasunut angajoqqaarsiassaqarniarnerput ajornartorsiutigivarput.
Kommuneqarfik Sermersuumi inunnik isumaginnittoqarfimmi ingerlatsisoq Ellen Magnussen Aviaaja Kilimemut taama oqarpoq. Mads Lynge ilanngutassiami katiterisuuvoq.