Nunatsinni LGBT+ pillugu isiginnittaatsimut FN-imi oqalugiaat: Inunnik assigiinngisitsineq annertuvoq
![](/sites/default/files/styles/image_934x467/public/2023-07/Seqininnguaq%20Lynge%20Poulsen.jpeg?itok=Eli_5msF)
- Taamannak periarfissinneqartarneq assut qaqutigoorpoq - ingammik allannguiniarlutik ilungersuussisut silarsuaanni, Genevemi Naalagaaffiit Peqatigiinni minutsinik qulinik sivisussusilimmik oqalugiarsimasoq, Seqininnguaq Lynge Poulsen, taama oqarpoq.
Sisamanngormat oqalugiaataa suiaassutsikkut kinaassutsinut kinguaassiutillu atornerinut tunngassuteqarpoq.
Sukumiinerusumik oqaatigalugu, nunasiaataasimanerup kingunerisaanik nunatsinni LGBT+-eqarnermut qanoq sunniuteqarsimaneranik oqalugiaataani sammineqarpoq.
- Nunasiaataanerup siorna inuit akuersaartuungaatsiarsimapput, eqqumiitsuliortoq allannguiniarlunilu ilungersuussisoq 21-nik ukiulik taama oqarpoq.
Inuiaqatigiit iluanni suiaaqatiminoortuuneq imaluunniit inunnguusitut suiaassutsimik kinaassuseqannginneq nalinginnaasuusimasoq taassuma nassuiarpaa.
Ullutsinni taakku tassaapput inunnguusitut suiaassutsitik akerliannik kinaassusillit imaluunniit angutitut arnatulluunniit imminnut kinaassuseqartinngitsut.
- Ullumikkut immikkoortinneqartorujussuupput, Seqininnguaq Lynge Poulsen oqarpoq erseqqissarlugulu nunatsinni inuit LGBT-mut ilaasortaasut annertuumik immikkoortinneqartartut.
Nalunaarusiamut sunniuteqartoq
LGBT+ eqqartorneqartillugu nunap inoqqaavi ilanngunneqartassapput, Seqininnguaq Lynge Poulsenip innersuussuterpassuisa ilaat taama nipeqarpoq. Aamma inuit pingaarutillit taakkua tusarnaarpaat.
- Immikkut ingerlatsisut, NGO-t, allannguiniarlutik ilungersuussisut, naalaagaaffiit sinniisui kiisalu nunap inoqqaavisa pisinnaatitaaffiinut immikkut ilisimasallit najuupput, Seqininnguaq Lynge Poulsen oqarpoq ilanngullugulu oqaatigaa oqalugiaatini Naalagaaffiit Peqatigiinni inuit pisinnaatitaaffii pillugit siunnersuisooqatigiit nalunaarusiaanni ilanngunneqassasoq.
- Tamanna annertuumik angusaqarninnik isumaqarpoq: isummersoqatigiiffimmi peqataallungalu nalunaarusiami ilaalerpunga.
Seqininnguup oqalugiaataa nunap inoqqaavinut ilinniarnermut atatillugu aaqqissuussamut, sapaatit akunnerini peqataaffigisimasaani, naggasiutigineqarpoq. Aaqqissuussami Seqininnguaq Lynge Poulsen nunarsuarlu tamakkerlugu nunap inoqqaavi 44-t peqataapput. Taanna kisiartaalluni nunarput Inuillu sinnerlugit peqataavoq.
- Assut ilikkagaqaqaanga inuillu soqutiginaqisut naapippavut soorlu immikkut ingerlatsisoq (José Francisco Cali Tzay, aaqq.) kiisalu inuit pisinnaatitaaffii pillugit kommissæri (Volker Türk, aaqq.).