Inunni uumasunilu kviksølvi ernumatitsivoq
Kviksølv nunani issittuni annertuvoq, uumasunut inunnullu navianartorsiortitsilluni, taamaattumik nunarsuarmiut piaartumik qanoq iliuuseqartariaqartut, Issittumi Siunnersuisoqatigiit isumaqarput.
Siunnersuisoqatigiinni suleqatigiissitap, AMAP-ip, Issittumi nakkutilliinermik aamma nalilersuinermik suliniarfiup, Issittumi kviksølvip annertussusaa ukiuni kingullermi misissuiffigaa, paasissutissanillu katersilluni.
Missuinermi uppernarsillugu paasineqarpoq, Canadap Kalaallit Nunaatalu imartaanni uumasut aalisakkallu kviksølveqarnerat annertusiartortoq.
Amerika Avannarlermi mingutsitsineq annikillisinneqaraluartoq, imaani kviksølv annertusiartorpoq.
Tamanna isumaalunnermut tunngaviulerpoq, uumasut aalisakkallu kviksølvinik akoqartut inuussutissatut nerineqartarmata. Tamanna pillugu AMAP- ip nalunaarusiaata naalisarneqarnera saqqummingajalerpoq.
Issittumi avannarlermi mingutsitsisoqannginnera pissutaalluni, issittup imartaani kviksølveqarnera manna tikillugu paasiuminaatsinneqarpoq.
Silaannaap ingerlaarfii immap sarfaasa ingerlaannarnerannit, aammalu inuit pilersitaannit, kuuit mingutsinneqarnerannit kviksølv issittup avannaata imartaanut pisimavoq.
Aamarsuit atorlugit nukissiorfiit nunarsuarmi tamaniiittut issittup imartaani mingutsitsinermut pisooqataasunut ilaapput.
Ungasinnerusoq eqqarsaatigalugu ajornartorsiutip qaangerneqarnissaanut iliuusissaq taassatuaavoq nunarsuarmi mingutsitsinerit annikillisinneqarnissaat, AMAP qulakkeerlugu taama inerniliivoq.
Issittumi, taamatullu nunarsuup sinnerani, kviksølv annikillisinneqassappat, nunat tamat suleqatigiiffigisaannik iliuuseqartoqartariarpoq, AMAP-ip nalunaarusiaaa aallaavigalugu Issittumi Siunnersuisoqatigiit taama naliliipput.
Issitumi Siunnersuisoqatigiit ilaasortai ministerit, Nuummi maajip ulluisa aqqaneq aappaanni ataatsimiinneranni, AMAP-ip nalunaarusiaa saqqummiunneqassaaq.
