Inuk Silis Høegh qaammaqqusersuilluni festivalimi peqataalersoq
Saqqummersitsineq Circle 6 festivalimut siunnersuutitut nassiunneqartut 50-init amerlanerusut akornanni toqqagaasimavoq. Saqqummersitassaat tassaavoq manninnik nigaliliaq qaammaqqusersugaq, taannalu upperisani ileqqulersuutigalugit sanaartukkat itsarnitsat, soorlu assersuutigalugit Stonehenge, pyramidit Perumilu inkatoqqat illukui isumassarsiorfigalugit suliarineqarsimavoq, eqqumiitsuliortut ilaat, Norgemiu suliffissuaqarnermi ilusilersuisartoq Arild Kalseth oqarpoq.
-Ujaqqanik nigaliliarpassuit aammalu upperisani ileqqulersuutigalugit sanaartukkat soqutigilugit nutaalianngorlugit samminiarlugit toqqarsimavarput, taamaalilluta qanoq atorneqartarsimaneri nutaalianngorlugu takutissinnaassagatsigu.
Inuk Silis Høeghip Arild Kalsethillu canadamiu Amelie Deschamps suleqatigissavaat. Katsorsaanermi periaasitoqqat nutaalianngorlugit takutinnissaat eqqarsaataavoq:
-Kikkulluunniit katsorsaallutik ajorunnaarsitsisinnaanerat takutikkusupparput. Taamaammat isiginnaariartut tamaasa ilusilersukkamut tunngatillugu sunniivigeqatigiinnissamut peqataaqqullugit qaaqquniarpagut, nammineq healeralutik imaluunniit healertillutik, Arild Kalseth oqarpoq.
Reykjavikimi qaammaqqusersuilluni festivalertitsinissaq ullouni februaarip ulluisa arfernanit 16-iata tungaanut ingerlanneqartussaavoq, Circle 6-illu saniatigut tuluk qaammaqqusersuilluni eqqumiitsuliortoq Kitty Von-Sometime Reykjavikip aqquserngini nuarlunnik eqqumiitsuliaminik takutitsiniarpoq, aammalu islandimiut Kristján Gunnar Kristjánsson Örvar Halldórssonilu Reykjavikimi eqqaassutissat qaammaqqusersorlugit suliaqarniarput.
Qaammaqqusersuilluni festival Reykjavikip saniatigut aamma Torshavnimi Manchesterimilu takutinneqassaaq. Eqqumiitsuliortullu neriuutigaat saqqummersitartik Circle 6 allani aamma takutinneqarsinnaajumaartoq, pingaartumik nammineq nunagisaminni: Kalaallit Nunaanni, Norgemi Canadamilu.
Inuk Silis-Høegh oqaaseqartinniaraluaratsigu, Sume pillugu filmilianimik killuilluni ulapimmat iluatsinngitsoorparput.
