Inuk malunnaatilik Permagreenip siulersuisuinut ilaasortanngortoq
Kalaallit Nunaanni inuttaqassutsiminut naleqqiullugu anginngitsumi inuussutissarsiornermi pisortat pikkorissut imaaliallaannaq pissarsiassaanngillat, taamaammat Henrik Lethimik polit-imik ilinniagaqartumik siulersuisunut ilaasortanngornissamut akuersititsinermigut Permagreen iluatsitsilaavissorpoq.
- Suliffeqarfitta nukittorsarneqarnissaa assigiinngitsutsigut sulissutigaarput, taamaaliornikkut suliniutit angisuut qanittumi aallartissagaluarpata suliassanik tigusisinnaanissarput neriuutigalugu. Ilaatigut nunaqavissut aatsitassarsiornermik suliniutini aggersuni peqataanerunissaat aqqutissiuukkumallugu MT Højgaard EMJ-Atconilu peqatigalugit konsortiamik pilersitsivugut. Ataatsimut isigalugu Kalaallit Nunaanni suliffeqarfittut suliatigut aaqqissuussaanikkullu suliassat ukiuni aggersuni amerlanerulersussatut naatsorsuutigisagut piareersaateqarfigissavagut. Tassungalu atatillugu Henrik Leth siulersuisunut ilanngunnera naleqqulluarpoq, Preben Kold Larsen, Permagreen Grønland A/S-imi pisortaq oqarpoq.
Permagreen Kalaallit Nunaanni entreprenøritut suliffeqarfiit annersaraat sanaartornerullu nutarsaanerullu iluani suliat suulluunniit ukiunik 50-inik misilittagaqarfigalugit. Nuup, aamma allaffeqarfigineqartup, saniatigut aamma Sisimiuni, Qaqortumi, Maniitsumi Narsamilu immikkoortortaqarpoq, katillugulu 275-it missaannik sulisoqarluni.
-Suliniutit angisuut inuiaqatigiit ineriartornerannut sunniuteqartinneqalissappata, suliffeqarfiit nunanit tamalaaneersut suleqatiginissaannut nukittorsarnissamik anguniakkat Kalaallit Nunaata pisariaqartitaanut assersuutissaalluarput. Matumani aamma Permagreenip ilinniartitaanermut politikkia maluginiarneqassaaq, suliaqarfinnimi assigiinngitsuni - assassorissanik suliaqartunit ingeniørinut -maannakkorpiaq lærlinget, ilinniartut suliffimmillu sungiusartut 30-iupput. Tamakku minnerunngitsumik eqqarsaatigalugit Permagreenip iliuusissatut pilersaarutaata piviusunngortinnissaanut inerisaaffigeqqinnissaanullu peqataanissara qilanaarivara, Henrik Leth naqissusiivoq.