Inuit ukiuat iluatsilluarpoq

Ukiorlu aallartippoq naggueqatigiit Inuit eqqumiitsuliaannik Canadap Katersugaasiviani saqqummersitsinermik, assuarluni nereqatigiinnertalimmik. Ukiullu ingerlanerani allarpassuarnik aamma pisoqarpoq.

Februaarimi ukiuunerani OL-ertoqarnerani inuksuk qalipaatigeqisoq ilisarnaatigineqarpoq. Vancouverimi OL-ertoqarnerani inuksuk ilisarnaataareermat Cananda tamakkerlugu ilisarnaatinngorpoq; tamassumalu Canadamiunut nunanillu allaniit tikeraartunut naggueqatigiit Inuit nunap pingaarutaannut ilaasut eqqaasitsissutaavoq.

Inuit Tapiriit Kanatami ukiup ingerlanerani Canadami naalakkersuisut naggueqatigiit Inunnut atugarissaarnerulernissaat anguniarlugu suleqatigisimavaat. Pisuni pingaarnerit ilagaat, naggueqatigiit Inuit 1953-imi pinngitsaalisamik Qaasuittumut Aasuttumullu nuutsinneqarsimasut Canadap ministeriuneranit Stephen Harper-imit pisortatigoortumik utoqqatserfigineqarnerat. Ukiarlu naalakkersuisut nalunaarutigaat Nunat inoqqaavisa pisinnnatitaaffii pillugit Naalagaaffiit Peqatigiit nalunaarutaat atsiornissaannut piareersimallutik. Utaqqineqarsimaqisoq.

Naggueqatigiit Inuit inooriaasiat kulturiallu illersorniarlugit naalakkersuisut aamma iliuuseqarsimapput, ilaatigut Ualerngup Imartaa qilalugaqarfiusoq eqqissisimatitaalersippaat, Tallorutip Imartaa eqqissisimatitaalerpoq Eqaluttuutsiamilu issittumi misissuisoqarfimmik, Søren Rysgaardip Nunatsinni Silap pissusaanut ilisimatusarfimmeersup aqutassaa, pilersinneqarpoq.

Nunavummiut Makiviup ukiunik 35inngortorsiornera Novembarimi nalliuttorsiutigaat, Pallivittamilu Inuit Nunatsiavumik naalakkersuisoqalernerminnit decembarimi ukiut tallimanngorpaat.

Ukiup aallartinnerani, katersugaasivimmi assuarluni nereqatigiinnermi Nunavumi naalakkersuisuni siulittaasoq Eva Aariak oqalugiarnermini ilaatigut ima oqarpoq:

- Kissaatigaarput 2010 kisimi naggueqatigiit Inunnut ukiussanngitsoq ukiulli siunissami aggersussat tamarmik naggueqatigiit Inuit ukiorigumaaraat.