Inuit tv-eqarfissuarmik pilersitsiniarnerat ICC-p nuannaarutigaa

Aallakaatitassiat Kalaallit Nunaanninngaanneersut Alaskameersullu pingaarnerutinneqartut, Nunavummi innuttaasut isumasiorneqarmata paasinarsivoq.

Inuit Issittormiut Siunnersuisoqatigiiffiata ICC-p siulittaasuata Aqqaluk Lyngep tamanna nuannaarutigaa:

- Assorujussuaq nuannaarutigaa. Siorna juulimi ataatsimeersuaratta siunertarineqartut ilagivaat Inuttut oqaaseqartut Canadami, Alaskami Kalaallit Nunaannilu isiginnaagassatigut tusarnaagassatigullu suleqatigiilissasut.

Oqaatsivut kulturerpullu tunuliaqutaralugu aallakaatitanik amigaateqarpugut, taamaattumik alloriarneq taamaattoq pinngitsuuinnani suleriaqqinnissatsinnut iluaqutaassaaq, Aqqaluk Lynge oqarpoq.

Pilersaarutit taamaattut akisusinnaapput. Suleqatigiilluartoqarneratigulli aningaasartuutikinnerusoqarsinnaasoq, Aqqaluk Lyngep oqaatigaa:

- Aningaasalersorneqarnissaa tamatigut uniffiujuarpoq, kisianni ajornanngitsumik suleqatigiittoqarsinnaavoq. Aallakaatitassanik suliareriikkanik paarlaasseqatigiittoqarsinnaavoq, aallartereerpallu ineriartortinneqarsinnaalluni. Aningaasatigut assersuutigalugu Amerikamit Nunatsinnut isertitsissutaasinnaanera eqqarsaatigineqarsinnaavoq. Aningaasat taamaattumik unissutaasariaqanngillat, ICC-p siulittaasua Aqqaluk Lynge oqarpoq.

KNR-ip siunissamut pilersaarutaani 2010-mit 2014-imut atuuttumi takuneqarsinnaavoq namminneq TV-kkut nunanillu allanit TV-kkut aallakaatitassianik KNR aallakaatitsisarniartoq, nunallu inoqqaavisa allat tusagassiorfiisa aallakaatitassiaannik KNR matumani aamma aallakaatitsisalissasoq.