Inuit TB-mut katsorsartikkiartorlutik periarfeerunneqartut nassaariniarneqartussanngortut
Canadap issittortaata kangisissuani, maanna Nunavimmi Nunavumilu, naggueqatigiit inuit akornanni sakialluummik tuberkulosemik 50-ikkunni nappaalasoqarpoq.
Inuit tamarmiusut affaasa missaat ukiut qulit ingerlanerini nunap kujasinnerusuani TB-sanatoriamut katsorsartikkiartortinneqarput. Inuit piffissami tassani 11.500-iusunit 5.240-t aallartitaasimanissaat naatsorsuutigineqarpoq.
Inuit napparsimasut aallarutiinnarneqartarsimapput, ilaatigullu anaanaasut naalungiarsuutaannik arsaarneqartarsimapput naalungiarsuillu talittarfimmi allamut tunniutinnnariarlugit anaanaasut umiarsuarmik napparsimmaviutigisumik kujataanukaanneqartarlutik.
Canadami Inuit ilarpassui 60-ikkunni suli angalaannartuupput, aamma naggeqateqannginnamik angerlartinneqartussanngoraangata nassaariniarnissaat ajornakusoortarsimavoq ilaatigullu ajornavissortarsimalluni, aamma amerlaqisut kujataaniinnerminni toqusimapput.
Tamannalu pissutigalugu ilaqutaasut nassaariniarnissaat, toqusimappatalu sumi ilineqarsimanerat paasiniassallugu ajornakusoortupilussuuvoq.
Inuit Tapiriit Kanatami ITK Canadami naalakkersuisut suleqatigalugit Inuit TB-mut katsorsartikkiartorlutik kujataanukartinneqarsimasut aqqinik qarasaasiakkut katersuiviliorneq maanna naammassilerpaat.
Suliniutigineqartoq taaguuteqarpoq Nanilavut.
ITK-p præsidentitata Natan Obedip CBC Newsimut oqaatigaa tamanna ilaqutariit qanoq pisoqarsimaneranik kiisami paasisaqarnisaannut iluaqutaassasoq. Aamma Canadami naalakkersuisut peqqusimavai pisimasunut pisortatigoortumik utoqqatseqqullugit.
