Inuit Tapiriit Kanatami: Naalakkersuisut atsioqataasariaqarput
Inuit Tapiriit Kanatami, naggueqatigiit Inuit Canadami kattuffigisaata maanna Canadami naalakkersuisut isummernerat allanngortinniarlugu sunnerniarsarilerpai, taamaalillutik Naalagaaffiit Peqatigiit Nunat Inoqqaavisa Pisinnaatitaaffii pillugit aalajangersagaat atsioqataaffigisinnaaniassammassuk.
Aalajangersagaq pingaarutilik taanna nunarsuatsinni naalagaaffiit amerlanersaasa atsioqataaffigereerpaat. Australiap atsioqataajumanngikkaluartup isummernini allanngortillugu ukiormanna apriilimi aalajangersagaq atsioqataaffigaa. Taamaalilluni naalagaaffiit atsioqataajumanngitsut pingasuinnanngorput, tassaasut Canada, USA aamma New Zealand.
Matumani eqqumiitsunut ilaavoq, Canada aalajangersagassap oqaasertaliorneqarneranut peqataanikuummat, tassa naalakkersuisut allanngunngikkallarmata. Maannali naalakkersuisuusut allatut isummerlutik, oqaatigaat nunap inoqqaavi pisinnaatitaaffeqareeqimmata, taamatut aalajangersagaqarnissaq pisariaqanngitsoq.
Præsident Obamap USA-p atsioqataasinnaanissaa maanna isumaliutigaa, taamaattumillu Inuit Tapiriit Kanatami isumaqarput, Canadami naalakkersuisut atsioqataanissaannut piffissanngortoq, taamaalilluni Canada nunat inoqqaavisa pisinnaatitaaffiinik nunarsuatsinni atsiorumanngitsuni kingullerpaanngoqqunagu.
Naalagaaffiit Peqatigiit aalajangersagaat inuit pisinnaatitaaffiinut tunngasuuvoq, tassanilu tapersersorneqarlutik nunat inoqqaavisa pisinnaatitaaffii, namminersornermut, nunamik pisuussutaanillu oqartussaanermut, kulturimut, oqaatsinut, suliffissaqarnissamut, peqqissutsimut ilinniagaqarnermullu tunngasuni.
