Inuit tallimat Aasiaat Kangaatsiallu akornanni annaanniarneqartut

- Inuit tallimat Nassuttuumiissimapput, Aasiaat kujataanni. Immap sikuunera pissutigalugu umiatsiaaqqat ingerlariaqqinnaveersimapput. Ataaserlu umiatsiat kaanngartinniarneranni imaanut isissimalluni. Isittoq nunamut qaqisinnaasimavoq, Kalaallit Nunaata Politiivini pigaartut pisortaat Malik Olesen Sermitsiaq.AG-mut oqaluttuarpoq.

Umiatsiaaqqat pingasut tallimanik inuttaqartut ingerlariaqqinnaviileramik ikioqqullutik Aasiaat Radio aqqutigalugu ippassaq unnukkut nalunaaqutaq qulit missaanni kalerrisaaripput, ujaasinerlu kingorna aallartilluni.

AAMMA ATUARUK Issittumi Sakkutooqarfik: Uuliamik mingutsitsisoqaqqinngikkallarpoq

Nakkutilliissut Ejnar Mikkelsen sumiiffimmut ullaaq manna apuuttoq politiit oqaatigaat, inuttallu tallimat annaanneqarsinnaasimapput, ataaserlu nilloriartupallassimammat nakorsanit misissorneqartussaasimasoq politiit aamma nalunaarutigaat. Ejnar Mikkelsen Sisimiut tungaannut taava ingerlaarpoq, annaanneqartullu peqqinnissaqarfimmit misissorneqassasut nalunaarutigineqarluni. Sermitsiaq.AG politiit nalunaarutaat aallaavigalugu taama allappoq.