Inuit Studies iluatsilluarpoq
Ataatsimeersuartarnerillu allanngoriartorsimaqaat. Siullerpaamik ataatsimeersuartoqarmat, taamani naggueqatigiit Inuit marluinnaat peqataapput, taakkulu paasisassarsiorfigineqaqalutik. Maannali ataatsimeersuarnermi peqataasut 550-iusut affaat naggueqatigiinnit Inunneersuupput maannalu ilisimatuutut misissuisuni ilanngussimallutik.
Kalaallit 50-it ataatsimeersuarnermi peqataapput. Taakkunannga 20-t tassaallutik Ilisimatusarfimmi ilinniartut ilinniartitsisullu, aqqanillit Uummannami meeqqat angerlarsimaffianneerlutik, taakkulu Nunatsinni qanga pissutsinik saqqummersitsinerat nuannarineqarluni maluginiarneqarluarpoq.
Tupaarnaq Rosing Olsenip tv-kkut aallakaatitassiaminit Qaannat Alannguanni-meersunik tigulaarinnilluni takutitsivoq, isiginnaartunillu nuannarineqarluarluni.
Aqqaluk Lynge ataatsimeersuarnernut pilersaarusioqatigiinni ukiuni kingullerni marlunni ilaasortaasoq, Radioaviisimut oqarpoq, ilisimatuutut misissuisut aamma naggueqatigiit Inuit suleqatigiittarnerat nutaamik alloriarfiusimasoq, inuiaqatigiinni allannguutit angisuut maanna pisut, aamma assigiinngitsunik ilisimatusartut suleqatigiinnissaannik paarlaateqatigiittarnissaannillu, ilisimatuunut annerusumik piumasaqaateqarfiullutik.
Ataatsimeersuarnerup taaguutigaa, "nunarsuup qaavanit sunik ilikkagaqarsinnaavugut", Amerikamilu Avannarlermi issittumi ilisimatusarnerit allat assigalugit, qangaaniili ilisimasat immikkut pingaartinneqarlutik.
Bill Fitzhugh ataatsimeersuarnermik aaqqissueqataasoq aamma katersugaasiviup issittumut immikkoortuani pisortaasoq Radioaviisimut oqarpoq, ilisimatuut inuiaqatigiinnik misissuiffigisaminnik suleqateqarnissartik ilinniartariaqaraat taakkulu ilinniarfigisariaqaraat erseqqissarlugu.