Inuit sisamat umiatsiamik ikkarlissimasut annaanneqartut

(Allaaserisaq 04.11.2019 nal. 11:19 nutarterneqarpoq Issittumi Sakkutooqarfik annaassiniarnerminnik allaaserinnereersoq, aaqq.)

Umiatsiaq poca 770-eq, angutinik pingasunik arnamillu ataatsimik issimasulik, Maniitsumiit Nuummukartilluni Nuup eqqaani sukkasuumik ingerlaartilluni arfininngormat unnukkut ikkarlippoq.

Nuummi politiit pigaartui pisoq pillugu arfininngornermi unnukkut nalunaaqutaq 19:46 kalerrinneqarput. Umiarsuaq alapernaarsuut Lauge Kock tamatuma kingorna annanniumminik inunnik sisamanik pineqartunik annaassiniariartorpoq.

Issittumi Sakkutooqarfik naapertorlugu annaassiniarnerup aallartinnerani umiatsiap sumiiffia assigiinngitsunik nalunaarutigineqarsimavoq. Ilaqutaasulli ilaasa umiatsiaq sumiinnersoq ersarinnerusumik nalunaarutigisinnaasimavaat.

- Ajutoortut annaassiniut SAR-3 takugunikku erngerlutik kalerrisaarutinik aallartitsissasut ilisimatinneqarput, taakkualu taamaalilluni erngerlutik sumiiffissineqarput, Issittumi Sakkutooqarfik facebook-imi quppernermini allappoq.

Umiatsiaq ikkarlinnermini qeqertamut manissumut issugiunneqarsimavoq, tamannalu ilaasunut iluatsitsinerusimavoq imaanut nakkarsimanngimmata.

- Umiatsiami annanniut pullattagaq, kalerrisaarutit, atallaarsuit annanniutillu atisartakkat pigineqarsimammmata paasillugu qujanarpoq, Issittumi Sakkutooqarfik allappoq.

Issittumi Sakkutooqarfik naapertorlugu annaassiniut SAR-3 qeqertamut apuussinnaasimanngilaq, taamaattumillu inuit annaanniarneqartut umiatsiap annanniutaa pullattagaq atorlugu annaassiniummut SAR-3-mut assartorneqarsimapput.

- Qujanartumik annertunerusumik ajoqusertoqanngilaq, kisianni ilaasoq ataaseq nalunartut pillugit akiummut ikineqarpoq Nuummullu tikinnermini ambulancinit aaneqarluni, Arktisk Kommandomit taama allapput.

Politiit naapertorlugit umiatsiaq angallatigineqartoq kingusinnerusukkut aaneqartussanngorlugu qimaannarneqarallarsimavoq.