Inuit sisamat qaqqami sivingasumi annaanneqartut

Uummannap eqqaani Ikerasaap qaqqaani inuit sisamat helikopteri atorlugu marlunngornermi annaanneqarput.

Angut inuusuttoq kisimiilluni Ikerasaap qaqqaanut sivingangaatsiartumut majuartilluni

sumiissusersisinnaajunnaarpoq ingerlariaqqinnerlu ajulerluni, politiit taama nalunaaruteqarput.  

AAMMA ATUARUK Issittumi Sakkutooqarfik kilisaammik ikiuisoq

Angutip inuusuttup ataataa allanik marlunnik ilaqarluni, ikiorniarlugu majuarsimagaluarput ingerlariaqqissinnaasimanatilli, angut inuusuttoq

nalinginnaasumik ingerlaviusartup avataanut pisimammat sivingangaatsiartumullu, politiit taama nalunaarput.

Politiit kalerrinneqarput annaassiniarnerlu aallartinneqarpoq, Nuummi vagtcentralii Issittumi Sakkutooqarfik Uummannamilu qatserisartut qanimut suleqatigiillutik.

Annaassiniarneq Uummannami politiinit aqunnerpoq ataqatigiissarneqarlunilu.

Uummannami qatserisartut, taakkua qaqqani annaassiniarnissamut ilinniarsimasut, inunnik sisamanik ikiuiartorput, ingerlaannarli takusinnaasimavaat ikiuinissamut periarfissatuaq tassaasoq timmisartoq qulimiguulik atorlugu annaassiniarnissaq.  

AAMMA ATUARUK Inuit marluk Issittumi Sakkutooqarfimmit annaanneqartut

Air Greenlandip helikopteria annaassiniarnermi atorneqartartoq Issittumi Sakkutoqqarfik aqqutigalugu aggersarneqarpoq ingerlaannarlu Ikerasammut aallartinneqarluni.

Politiit tusagassiuutinut nalunaaruteqarnerminni oqaluttuarput annaassiniarneq ajornaatsuinnaasimanngitsoq,annaanniarneqartut sumiiffimmi ajornakusoortumi inissisimammata, annaassiniartut qaqqap sinaanut qanittuararsuullutik timmisariaqarsimammata, taamaalillunilu qulimiguullip kaavittui innaarsummut qanittuararsuusimallutik.

Annaassiniartut inuit sisamat qulimiguulimmut qaqissinnaasimavaat. Ullorlu taanna unnuup ilaa nunaqarfimmukaanneqarput.

Kalaallit Nunaanni politiit annaassiniarnermi suleqatigiilluarsimaneq pillugu qujassuteqarput,

immikkullu ittumik Uummannami qatserisartut, annaassiniaqataasut, Ikerasamillu innuttaasut aamma qutsavigineqarlutik