Inuit nutaamik allattaaseqalernissaat utoqqarnit isumaqatigineqanngilaq
Canadami Inuit utertarnikkaartumik allattaasiata, tassa syllabiskimik taaneqartartup, atorunnaarsinneqarluni uagut Nunatsinni allattaasitta assinganik atuilernissaq, Nunavummi, Nunavimmi Nunatsiamilu Inuit utoqqaat sapingajappaat, oqarlutik tamanna atorunnaarsinneqassappat kulturertik kinaassusertillu annaaneqassasut.
Canadami Inuit suleqatigiiffissuisa ilaatigut, Inuit Tapiriit Kanadami siuttoralugu, Inuit ataatsimut allattaaseqalernissaat pillugu isumalioqatigiissitarsuarmik pilersitsipput ukiut arlallit matuma siorna.
Allattaatsit assigiinngitsut qulingiluat atorneqarput
Inuit Canadami sumiiffinni assigiinngitsuniittut katillugit qulingiluanik assigiinngitsunik allattaaseqarput, tamarmik utertarnikkaartumik allattaaseqarlutik. Tassalu tamannarpiaq ilaatigut allanngortinniarlugu, Inuit Tapiriit Kanadami aamma naalakkersuisut suliniuteqarlutik.
Allattaatsillu allanngortinneqarnissaat, Inuit utoqqaat aamma Canadami Inuit amerlanerussuteqartut isumaqatiginngikkaat, Nunatsinni Oqaasileriffimmi oqaatsit pillugit siunnersorti, Nuka Møller oqaluttuarpoq.
- Tamannalu ingammik utoqqaat aalassassimaarutigisorujussuaat, syllabiskimik atuinerup atorunnaariartornera ernummatigalugu. Tamannalu radiokkut oqallinnerni aamma aalassassimaarutigineqartupilussuuvoq, tassami allattaaseq syllabiski kinaassutsiminnut tunngatittorujussuugamikku.
Allattaaseq pillugu ataatsimeersuarneq
Canadami Inuit ataatsimut allattaaseqalernissaat pillugu Eqalunni ataatsimeersuarnermi, aggustip 25-ani 26-anilu pisumi, Nuka Møller peqataavoq. Taannalu Nunatsinni nutaamik allattaaseqalernerput pillugu ataatsimeersuarnerup nalaani saqqummiussilluni.
Nuka Møller oqaluttuarpoq, utertarnikkaartumik immikkut allattariarsortarneq ilaatigut pissutaaqataalluni, Canadami inuusuttut akornanni Inuktitut oqaluttarneq maanna atugaajunnaavissimasoq, tamassumunnga pissutaanerulluni tamassuma ilinniarnera nalunarmat.
Inuusuttut maanna allattaasertik ilikkaruminaatsippaat
- Inuusuttut Inuit akornanni oqaatsiminnik atuiunnaariartorneq sukkasoorujussuarmik pivoq. Aamma allattaasertik syllabiski ilikkaruminaatsinnerarlugu oqalullutik piumasaralugulu abc atorlugu allattalernissaq.
Nunatsinni Oqaasileriffimmi oqaatsit pillugit siunnersorti, Nuka Møller aamma oqaluttuarpoq, Canadami nutaamik allattaaseqalernissaq pillugu oqallittoqarnera paasisinnaalluarlugu, tassa 1970-ikkunni nutaamik allattaasitaarnissarput pillugu ukiut qulit angullugit tamanna Nunatsinni oqallisaammat.
