Inuit Nunaanni aningaasarsiorneq ineriartortinneqassaaq
Inuit Nunaanni aningaasarsiornerup ineriartortinneqarnissaa, ICC-p Inuuvimmi Canadamiittumi, juulip 21-anit 24-ata tungaanut ataatsimeersuarneranni oqallisigineqartut pingaarnerit ilagilluinnarpaat. Ilaatigut issittup nunaasa sisamaasut aningaasarsiornikkut suleqatigiissinnaanerat kissaatigineqarluni.
Inuit Nunaanni aningaasarsiorneq pillugu siunnersuisoqatigiinnik pilersitsinissaq
Leona Aglukkaq, Canadami Avatangiisit pillugit naalakkersuisuusoq, Inuuvimmilu najugaqartoq, ICC-ip ataatsimeersuarnerani oqalugiarlunilu oqallinnerni tusarnaartuuvoq.
Aglukkap oqalugiarnermini oqaatigaa pingaartillugu, Inuit Nunaanni aningaasarsiorneq pillugu siunnersuisoqatigiinnik pilersitsinissaq, The Arctic Economic Council-imik taasamik.
Siunnersuisoqatigiit taakku nunani issittuni niuertut, suliffissuaqarfiit aamma sumiiffinni ataasiakkaani inuit suleqatigiinnissaannik siunnersuisarnissaq suliassarissallugu.
AAMMA ATUARUK Ane Hansen: ICC-mut tapiissutit ikilineri kukkuneruvoq
Leona Aglukkalli oqaatigaa, kissaatigineqartoq tamanna sorpassuartigut unammillernartuusussaassasoq aammali periarfissaqarluartoq oqaatigalugu.
Ilaatigut takornariaqarnermut sullissineq, umiarsuit issittup imartaatigut angallannerulernerisigut, nukissiuutit mingutsitsinngitsut atugaanissaannik suliniarnikkut taamatullu inuussutissat akuugaanngitsut nunat namminneq pissarititaanneersut atorluarneqarnissaannik suliniarnermi periarfissiinissaq.
Ikioqatigiittariaqarpugut
- Tamakku tamarmik iluatsissappata suleqatigiittariaqarpugut, tassami inuit issittormiut qangali ilisimasaat, ilisimatuussutsikkut ilisimasat aamma niuernikkut ilisimariikkat atorfissaqartikkatsigit, Aglukkaq oqarpoq naqissuserlugulu ilisimasat ataasiakkaarlugit atorniaraanni anguniagaq iluatsinnavianngimmat.
- Inuit kitaamiut kangiamiullu assigiinngitsunik atugassaqartitaasut suleqatigineqartariaqartut, tassami avannaamiut kujataamiullu kisimik suleqatigiinnerat naammanngimmat, Leona Aglukkaq oqarpoq nangillunilu oqaatigalugu niuertut ataasiakkaat aamma peqataanissaat pisariaqartinneqartoq.
AAMMA ATUARUK Naggueqatigiit Inuit aningaaserivissuannik pilersitsinissaq Kuupik V. Kleistip siunnersuutigaa
- Ullutsinni atukkat soorlu silap allanngoriartornerata pilersitaat unamminartuupput sungiunniagassaallutillu, tamannalu aamma suleqatigiissutigisariaqarparput, Issittumi Siunnersuisoqatigiit siulittaasuat, Leona Aglukkaq Radioaviisimut taama oqarpoq.
Issittumi Aningaasarsiorneq pillugu Siunnersuisoqatigiit pisortatigoortumik ukiaru septembarimi pilersinneqassaaq, tamanna pissalluni Canadami.
