Inuit naalliutsitaasarsimanerat UNESCO-p allattuiffianiilersut
Tusarniaanermi katersat tamaasa UNESCO-p kulturikkut kingornussat tigussaanngitsut pillugit allattuiffianut ilanngunneqartussanngorput, Canadami nutaarsiassaqartitsivik CBC News allappoq.
Ilumoortussaq Saammaasseqatigiinnissarlu pillugit Isumalioqatigiissitameersut naggueqatigiit Inuit, Indianerit Métisillu atuarfimmi nerisaqarfiullunilu ineqarfiusumi atuartuusimasut nalunaajaataannik oqaaseqaataannillu allanik katersaqalerumallutik Canadami ukiuni tallimani tusarniaapput.
Taamani atuartut kinguaassiutitigut, tarnikkut timikkulluunniit atornerlunneqakkajuttarsimallutillu naalliutsinneqakkajuttarsimapput.
Allagaatit, nalunaajaatit, filmiliat, videomik immiussat, taalliat, nipilersugassiat, assit, allagartallu uppernarsaatit tamanut saqqummiussat assigisarpassuilu tusarniaanermi katersat tamaasa Canadami Ilumoortussaq Saammaasseqatigiinnerlu pillugit Sullissiviup allagaataasivianiissapput.
Sullissivik Manitoba Universitetimiittuusoq inaarutaasumik nalunaarusiamik 2015-imi saqqummiisoqareernerata kingorna pilersinneqarpoq.
Katersat tusintilikkuttaajusut Canadap oqaluttuarisaanerata ilaata alianartup nunallu inoqqaavisa puiutsaaliornissaat qulakkeerumallugu allagaataasivimmiissapput.
Katersarpassuillu taakku UNESCO-p Canadamut tunngatillugu kulturikkut kingornussat tigussaanngitsut pillugit allattuiffianut ilanngunneqartussanngorput, CBC News allappoq.
- Tamanna killisimaarnartorujussuuvoq, Phyllis Webstad CBC Newsimut oqarpoq.
Phyllis Webstad atuarfimmi nerisaqarfiullunilu ineqarfiusumi atuartuusimasuni aniguisimasut ilagaat, isumaqarporlu kingulissatik siunissaat eqqarsaatigalugit aniguisimasut nalunaajaataat ukiorpassuarni allagaataasivimmiittussanngornerat inuiattut nunanit tamalaanit akuerineqarnermittut isigineqartariaqartoq.
