Inuit issittormiut indianerillu arnartaat amerlasuut toqutaasut
Toqutaasartut tassaanerupput arnat atortittartut ikiaroornartunillu atuisut. Arnat toqutaasimasut pillugit politiit misissuisarneri arriitsuaqqamik pisarsimavoq, ilaatigut ukiut arlerlugit misissorneqartarsimallutik. Alianartut tamakku pillugit, Canadami nunat ilaasa ministerii issittormiut siuttuinik ataatsimeeqatiginnipput, ajornartorsiut tamanna qanoq aaqqinneqarsinnaanersoq oqaluuserineqarluni.
Toqusoqarsimatillugu politiit paasiniaasarneri qanoq ingerlanneqartarnersut qulaajaaffiginiarlugu aamma paasiniaanerni aningaasartuutaasartut inuillu ataasiakkaat inooriaasiisa tunuliaqutaannik paasiniaasarnerit qanoq ingerlanneqartarnersut, Canadami indianerit tamarmik høvdingiat, Shawn Atleo maanna suliniuteqarlersoq, aviisip Globe and Mailip allaaseraa.
- Oqartussat tunuliaqutsiullugit paasiniaasoqartalerpat neriuutigaara ajornartorsiut tamanna minnerulerumaartoq ilorraallu tungaanullu aallartoqarumaartoq neriuutigaara, Shawn Atleo aviisimut oqarpoq.
Arnat issittormiut indianerillu toqutaasartut oqartussanit kisitsisaatigineqartoq, tassalu 600-it, ilimagisamit annertunerujussuusinnaasoq ilimagineqarpoq.
