Inuit innarluutillit Suleqataavunga aqqutigalugu suliffeqarfimmi peqataatinneqarnerulersinnaasut
Qeqqata Kommuniani inuit innarluutillit suliffissarsiortut suliffissarsisinnaanissaat ajornannginnerulissaaq.
Innarluutillit Illersuisuat, Tilioq suliffeqarnermut suliniummut ”sulisinnaavunga”–mut atatillugu Qeqqata Kommuniani Maniitsumi aamma Sisimiuni suliffeqarfinnik ”Suleqataavunga”-mut qaaqqusivoq.
AAMMA ATUARUK Tusilartut nutserisussaqanngillat
Suleqataavunga- suliffeqarfinnut inunnik innarluutilinnik suliffeqarfimminni annerusumik peqataatitsiumasunut attaveqarfiuvoq.
Suliffeqarfiit arfinillit Tiliumut pilersaarummik atsiugaqarput.
Sisimiuni Arctic Starimit Henrik Sachse taakkununnga ilaavoq.
– Suliffeqarfiit inuiaqatigiinnut akisussaaqataapput. Tassa inooqataanikkut akisussaaqataallutik aamma sapinngisamik piginnaasatik nukissatillu atorlugit inunnik avatangiiserisaminnit peqataatitsinissaminnut, Arctic Star ApS-imik piginnittoq Henrik Sachse oqarpoq.
Arctic Circle Business suliniummut Suleqataavungamut aamma peqataavoq.
- Suleqataavunga pillugu siunertamut nalunaaruteqassalluta aalajangerpugut tassami suliniummi nukissani tamani periarfissat pitsaasumik takuneqarmata. Suliffeqarfiit amerlanerusunut ammaannerisigut nunatsinni sulisinnaassuseqartut amerlisinneqassapput- namminersortunut aamma iluaqutaasussamik. Tamanut iluaqutaasinnaasumik ineriartortitsisoqarnissaanut suliniut iluaqutaassaaq, Arctic Circle Businessimi pisortaq, Louise Lynge Berthelsen oqarpoq.
Nunatsinni siulleq
Inuit innarluutillit illersuisuata Christina Johnsenip suliffeqarfiit namminersortut Qeqqatalu Kommuniata tapersersuinerannut nuannaarpoq.
AAMMA ATUARUK Ersinngitsunik innarluutillit kattuffinnit ukkanneqalersut
- Qeqqata Kommunia aamma Arctic Circle Business qutsavigaagut suliffeqarnermut suliniummut peqataanerannut, aamma suleqataavunga aqqutigalugu attaveqarfimmut peqataalernerannut. Inuit innarluutillit suliffeqarumasut sulilerniarneranni akimmiffiusartut suliniummi qulaajarneqarput. Ilisimavarpullu suliffeqarfiit inunnik innarluutilinnik peqataatitsiumallutik annertuumik iliuuseqartareersut, neriuutigaarpullu suleqataavunga pillugu attaveqarfeqarneq sineriammut siammartersinnaajumaarlugu, Christina Johnsen oqarpoq.
Attaveqaat Kalaallit Nunaanni taamatut aattaveqarfiulluni siullusoq, innarluutillit illersuisoqarfia, Tilioq oqarpoq.
