Inuit innarluutillit pillugit inatsit nutaaq nuannaarutigineqarlunilu isornartorsiorneqartoq
Inuit innarluutillit inuttut pisinnaatitaaffitik allat assigalugit atuisinnaasariaqarput.
Tamanna naalakkersuisunit inatsisissatut siunnersuummi nutaami Inatsisartuni pingasunngornermi aappassaanneerneqartumi ilaatigut pingaartinneqarpoq.
Inatsisissatut siunnersuummi assersuutigalugu inuit innarluutillit pillugit suliatigut isumaginninnerup pitsaanerulernissaa, inuusuttuunermi – inersimasuunermut ikaarsaariarneq pitsaanerunissaa qanigisaasullu ataasiakkaanut ilaqutariinnullu aaqqiissutissami pitsaanerpaappat inummik innarluutilimmik paarsinissanut periarfissaqarnissaa anguniarneqarpoq.
Inatsisissatut siunnersuummi tikeraarnissamut atatillugu pisinnaatitaaffiit pitsaanerulernissaat aamma sammineqarpoq.
KNR-ip Inuit innarluutillit oqaaseqartartuat, Qivioq Løvstrøm siunnersuutip aappassaanneerneqarneranut atatillugu sapaatip akunnerata siuliani oqaloqatigaa.
Taassuma inunnut innarluutilinnut susassaqarfimmi kiisami suliniuteqartoqarnera nuannaarutigaa:
- Tassa pingaaruteqartorujuuvoq assigiinngitsutigut inuit innarluutillit ulluinnarni tapersersorneqartarnerat taavalu aamma ikiorserneqartarnerat equngalaartarnikuugami immaqaluunniit amigaateqartarsimalluni, taakkulu amigaatit massakkut ilai aaqqiivigineqarniarneqarsarerpasipput, taannalu aamma ajunngilluinnarpoq.
Inatsisissatut siunnersuummi nutaami Pissassarfiup suliassaqarfii suunersut erseqqinnerusumik aamma nassuiaatigineqarput. Pissassarfik inuit innarluutillit pisinnaatitaaffinnik periarfissanillu ilaatigut aamma siunnersorsinnaalissavai.
Aningaasaqarnermut malittarisassat amigaataasut
Naalli Qivioq Løvstrømip inatsisissatut siunnersuut nutaaq pitsaasorpassuarnik oqaaseqarfigisinnaagaluarlugu inatsisissatut siunnersuummi immikkoortunik aamma ernumassuteqarlunilu amigaateqarpoq:
- Soorunalimi ilaa inuit innarluutillit pisassaqarfiat tamakkiisumik isigalugu uanga una naammaginartutut isiginngilara, ilaatigut soorlu ilinniartitaaneq ilanngunneqarnikuunnginnami.
Tamatuma saniatigut inatsisissatut siunnersuummi nutaamik aningaasaliinissamut aningaasaqarnermullu tunngasut oqaluuserineqarnissaat amigaataasoq Qivioq Løvstrømip oqaatigaa.
- Takuneqarsinnaanerusariaqarput kiap qanoq akisussaaffiginerai makku assigiinngitsut akiligassat aningaasaqarneq tungaatigut. Piviusorsiorpalaarnerusumik uagut kissaateqarnikuuvugut Tiliuminnganniit, taanna oqarpoq, nangillunilu:
- Innuttaasut aamma ilaa, qinnuteqassagunik taperneqarnissaminnut ikiorserneqarnissaminnut, iluamik allaqqanngippat aningaasat suminngaanniissanersut, taava uanga takorloorsinnaalereerakku kommunit arlallit akisaleriataartassasut: ”Ajoraluartumik akissaqannginnatta ikiorsersinnaanngilatsigit.”
Kommunit inatsisissatut siunnersuummi nutaami aningaasaqarnermut tunngatillugu ersarinnerusumik malittarisassaqartariaqarnera isumaqatigaat.
Borgmesterinit tallimanit sisamat anguniakkat pitsaasuunerarlugit tusagassiuutinut nalunaarummi allappaat, inatsilli inuit innarluutillit atugaannut pitsaanerulersitsissappat aningaasaqarnikkut sulinermilu pisariaqartunik sinaakkuteqartariaqarpoq.
Kommuneqarfik Sermersuumi, Qeqqata Kommuniani, Avannaata Kommuniani Kommune Qeqertalimmilu borgmesterit kaammattuuteqartuupput.
Inatsimmi neriorsuutigineqartut neqeroorutigisinnaanngikkaat
Borgmesterit sisamat aningaasaqarnikkut tamaviaarutassat saniatigut inatsisip atuutilersinneqarnissaanut atatillugu aamma ilungersugassaqartinnerarpaat.
Borgmesterit sisamat inatsisissatut siunnersuut maannakkutut isikkoqartillugu kommunit suliassamik kivitsiniarnissaat ajornakusoorsinnaasoq tusagassiuutinut nalunaarummi allappaat. Kommunit pisinnaatitaaffiit inatsimmi aalajangersarneqartut innuttaasunut aamma neqeroorutigineqarsinnaanissaat amigaatigaat.
- Kommuninullu nutaanik piumasaqaasersuisoqartillugu, suliassap suliarisinnaanissaanut piviusumik periarfissaqarsinnaasariaqarpugut. Taamaanngippat innuttaasut ilaqutariillu naatsorsuuteqalerseratarsinnaavagut kommuninit eqquutsitsinissamut pisarialinnik sakkussaqarfiginngisaannik, Kommuneqarfik Sermersuumi borgmesteri, Avaaraq Olsen (IA) oqarpoq.
Borgmesterit allat aamma taama isumaqarput. Qeqqata Kommuniani borgmesteri Malik Berthelsen (S) ilaatigut oqarpoq:
- Kommunitsinni najukkani assigiinngitsunik atugaqarpugut, ajornartorsiutaasartorlu ataasiinnaavoq. Pisinnaatitaaffiit piumasaqaatillu nutaat pisarialinnik tunngavissaqartinneqassapput. Taamaanngippat inatsisitigut neriorsuutigineqartut kommunimiillu innuttaasunut neqeroorutigineqarsinnaasut akornanni assigiinngissuseq angivallaalersinnaavoq.
Inatsisartut inatsisissatut siunnersuut novembarip 17-ianni pingajussaanneerneqartussaq pingasunngornermi taasissutigaat. Inatsisissatulli siunnersuut pingajussaanneerneqannginnerani Ilaqutariinnut Peqqinnissamullu Ataatsimiititaliamit suliarineqaqqaassaaq. Siunnersuut pingasunngornermi aappassaanneerneqarnermini akuerineqarpoq.
Inatsisissatut siunnersuut pilersaarut malillugu 2027-mi januaarip aallaqqaataanni atuutilissaaq.
