Partiit naalakkersuisoqatigiit Inuit Ataqatigiit Siumullu kinguariaateqassasut, inunnik isumasiuisartut Verianip aviisit Sermitsiaq Berlingskelu sinnerlugit inunnik isumasiuinerata tamanna takutippaa.

Sermitsiaq.AG taama allaaserisaqarpoq.

Inunnik ukioq manna januaarip ulluisa 22-ata 27-atalu akornanni isumasiuisoqarpoq, tassa inatsisartunut qinersisoqarnissaanut nalunaaruteqannginnerani inunnik isumasiuinerulluni.

Innuttaasut akornanni inuit 497-it partii sorleq qinerniarneraat interneti aqqutigalugu apersorneqarsimapput.

Inuit Ataqatigiit inatsisartunut kingullermik 2021-mi qinersinermi 36,6 procentinit taaguunneqartut 31 procentit missaannit maanna qinerneqassagaluarput.

Partii naalakkersuisoqatigiinniittut aappaat Siumut kingullermik qinersinermi 29,5 procentinit taaguunneqartoq aamma kinguariartussatut isikkoqarpoq, ullumikkut qinersisoqartuuppat 21,9 procentinit taaguunneqassagaluarluni.

Qinersisartut amerlasuut Demokraatinut nuunnissaattut akerlianik isikkoqarpoq, ullumikkummi qinersisoqartuuppat Demokraatit marloriaatinngussagaluarput - sinnerlugilluunniit.

Demokraatit kingullermik qinersisoqarmat 9 procentit missaannit taaguunneqartut maanna 18,8 procentinit taaguunneqassagaluarput.

Naleraq siuariartussatut aamma isikkoqarpoq. Ukiut sisamat matuma siornatigut qinersisoqarmat Naleraq 12 procentinit taaguunneqarpoq, maannalu 16,5 procentinit taaguunneqassagaluarluni.

Atassut siuariartussatut aamma isikkoqarpoq, kingullermimmi qinersisoqarmat Atassut 7 procentinit taaguunneqarpoq maannalu 9,7 procentinit taaguunneqassagaluarluni.00:02:06

Partiili suna qinerusunnerlugu qulartut 30 procentiusut aamma maluginiagassaavoq.