Inuit Ataqatigiit kommunimut qinersinissaq pillugu: Uku qineqqusaarutigissavagut
Inuit Ataqatigiit kommuninut qineqqusaartussatik qineqqusaarutissatillu ullumi tunniuppaat.
Taakku borgmesterimut qinigassanngortittut tallimat qineqqusaarutissatik pillugit tusagassiortunik tallimanngornermi ualikkut katersortitsineranni saqqummiunneqarput.
Kommuneqarfik Sermersuumi borgmesteri, Charlotte Ludvigsen, Kommune Qeqertalimmi borgmesteri, Ane Hansen aamma Qeqqata Kommunianut borgmesterimut qinigassanngortittoq Agathe Fontain siulittaasortik Múte Borup Egede peqatigalugu Nuummi Katuap inersuaaraanni saqqummiipput.
AAMMA ATUARUK Inuit Ataqatigiit: Siuttunngussagutta Kuannersuarni suliniut unitsissavarput
Kommune Kujallermi borgmesterimut qinigassanngortittoq Stine Egede aamma Avannaata Kommunianut qinigassanngortittoq Bendt B. Kristiansen isiginnaarut atorlugu peqataapput.
Qinigassanngortittut tallimat qineqqusaarutissatut sammisassatik pingasut pingaarnerpaat tusagassiortunut minutsini 15-ini saqqummiuppaat.
Kommuneqarfik Sermersooq
Charlotte Ludvigsen siulliuvoq.
Taassuma ineqarneq, ilaqutariinnut inuusuttunullu susassaqarfiit ukkatariniarpai.
Inuit Ataqatigiit Charlotte Ludvigsen siuttoralugu Suleqatigiissitsisut Demokraatillu peqatigalugit Kommuneqarfik Sermersuup 2021-mut missingersuutitut isumaqatigiissut sammisanut taakkununnga tunngavoq akuerinikuuaat.
Missingersuutinut isumaqatigiissummi kommunimi tamarmik inissiat nutaat 1.850-it sanaartorneqarnissaat ilaatigut pineqarpoq.
Charlotte Ludvigsenip isumaqatigiissut atsiorneqarsimasoq taamaammat ingerlateqqinniarpaa.
Inuit Ataqatigiit Kommuneqarfik Sermersuumi kommunimut qinersinissamut 18-inik qinigassanngortitaqarpoq.
Kommune Qeqertalik
Tamatuma kingorna Kommune Qeqertaliup borgmesteria Ane Hansen sammisassanik pingasunik saqqummiivoq.
Taassuma meeqqat, illoqarfiit nunaqarfiillu ineriartortinnissaat – inuussutissarsiutinullu periarfissat ukkatariniarpai.
Meeqqat meeqqat atuarfianni aallartinnginnerminni angusarissassaapput, meeqqat atuarnerminnik naammassinermi angusaat pitsaanerulissapput atuarfimmiillu qimaasartut ikinnerussallutik. Sammisat taakku kommunip missingersuutitut isumaqatigiissutaani ilisarineqarsinnaasut Ane Hansenip tusagassiortunik katersortitsinermi ilaatigut oqaatigaa.
Taassuma Kommune Qeqertalimmi sumiiffiit tamarmik ukiut 20-t 30-llu akornanniittut qaangiuppata kuutsittakkanik perusuersartarfeqalissasut aamma oqaatigaa.
Inuit Ataqatigiit Kommune Qeqertalimmi kommunimut qinersinissamut 18-inik qinigassanngortitaqarpoq.
Qeqqata Kommunia
Borgmesteriumut qinigassanngortittoq tullia tulliuppoq. Agatha Fontainip Qeqqata Kommuniata borgmesteria Malik Berthelsen (Siumut) borgmesteritut atuuffimmik unammillerniarpaa.
Taassuma qineqqusaarutai ilinniartitaanermut, ilaqutariinnut – aamma aalisartut piniartullu tunitsinissamut periarfissaanut kiisalu suliffissaqarnissamut tunngapput.
Qeqqata Kommuniani tunitsiviusinnaasut amerlanerussasut, Agathe Fontain ilaatigut isumaqarpoq.
Inuit Ataqatigiit Qeqqata Kommuniani kommunimut qinersinissamut 13-inik qinigassanngortitaqarpoq.
Kommune Kujalleq
Nunatta kujataani Stine Egede ukkatariniakkanik pingasut isiginnaarutikkut saqqummiuppai.
Taakku Kuannersuarnut, nunalerinermik ineriartortitsinermut Kommune Kujalliullu aqunneqarneranut tunngapput.
Taasuma Kuannersuarni aatsitassarsiornissamik suliniutip unitsinneqarnissaa ilaatigut sulissutiginiarpaa. Taassuma nunalerineq maanna atuuttoq tassunga taarsiullugu inerisarnissaa oqaatigaa, nunatta kujataani kukkukooqarnissamut periarfissat ilaatigut misissorneqartikkusuppaa.
Inuit Ataqatigiit Kommune Kujallermi kommunimut qinersinissamut 20-nik qinigassanngortitaqarpoq.
Avannaata Kommunia
Avannaata Kommuniani borgmesterimut qinigassanngortitaq, Bendt B. Kristiansen tullinnguuppoq.
Taassuma ineriartorneq, avatangiisit kiffartuussinerlu sammivai.
Taassuma kommunimi illoqarfiit nunaqarfiillu tamarmik ataatsikkut ineriartortinneqarnissaat kissaatigaa.
Inuit Ataqatigiit Avannaata Kommuniani kommunimut qinersinissamut aqqaneq-marlunnik qinigassaatitaqarpoq.
