Inuit Ataqatigiit Inatsisartuni gruppiat nutaamik siulittaasortaarpoq

Inatsisartuni gruppimi siulittaasunngortoq tassaavoq Peter P. Olsen, ilaatigut Inatsisartut kultureqarnermut, ilinniartitaanermut, Ilisimatusarnermut Ilageeqarnermut aammalu Aningaasaqarnermut Akileraartarnermullu ataatsimiititaliani ilaasortaasoq.

Agathe Fontainip Inatsisartuni gruppi ukiuni arlalinni siuttuuffigereerlugu nukimi allanut atornissaannik kissaateqalerneratigut Peter P. Olsen siulittaasunngorpoq.

Agathe Fontainili gruppimi siulittaasup tulliatut ingerlaqqissaaq.

Tamatuma saniatigut Inuit Ataqatigiit Inatsisartuni gruppiata Naaja Nathanielsen ukiuni arlalinni aningaasaqarnermut ataatsimiititaliami ilaasortaasoq gruppip aningaasaqarneq pillugu oqaaseqartartussaatut toqqarpaa.

Tamatumunnga peqatigitillugu Naaja Nathanielsen politikkikkut oqaaseqartartutut tunuarpoq partiip politikkikkut siulittaasup tullerisaanit taarserneqassalluni.

- Nuannaarutigaara nukivut pitsaanerpaamik atorumallugit inissisimaffinnik nikititertaratta, IA-p siulittaasua Sara Olsvig oqarpoq nangillunilu;

- Inatsisartuni sulilluarnerput nangissavarput partiillu allat suleqatigilluarnissaat aamma qilanaaraara, Sara Olsvig taama allappoq.

Inuit Ataqatigiit Inatsisartuni gruppiata ataatsimiititaliani ilaasortaaffinnik aamma allanngortitsivoq. Tamanna partiip folketingimut ilaasortaatitariligaata Aaja Cheminitz Larsenip Inatsisartunit sulinngiffeqaneranik peqquteqarpoq, tassungalu sinniisuussaaq Múte Bourup Egede.

Ataatsimiititaliani inissititernerit nutaat Inatsisartuni ukiaanerani ataatsimiinnerup aallartinnerani nalunaarutigineqassapput.