Inuit Ataqatigiit ataatsimeersuassapput
Ataatsimeersuarnermi qaaqqusat arlallit peqataasussaapput, soorlu Nunani Avannarlerni partiit saamerliusut Inuit Ataqatigiinnut assersuunneqarsinnaasut peqataatitaqassallutik. Danmarkimiit SF-ip siulittaasua Villy Søvndal, Islandimiit Det Venstre Grønne partiip siulittaasua Islandimilu Aningaasaqarnermut Naalakkersuisoq Steingrimur J. Sigfusson, Sverigemi Venstre partiip siulittaasua Lars Ohly taamatullu Savalimmini Thjodveldi partiip siulittaasua folketingimilu ilaasortaq Högni Høydal tikeraartorineqassallutik.
Ataatsimeersuarnermi oqalugiaqquneqarlutik qaaqqusat ilagaat, Danmarkimi partiit ilaannit Enhedslistenimeersoq Line Barfod, Nunatsinni Demokraatit siulittaasuat Jens B. Frederiksen aamma ICC-p siulittaasua Aqqaluk Lynge.
Ataatsimeersuarnermut peqataaniarlutik nalunaarsimasut ippassaq kisinneqartut naapertorlugit 123-upput. Ataatsimeersuarneq aqagu nalunaaqutaq ualikkut marlunut Nuup Katersortarfiani ammarneqassaaq.
