Saassussineq Inuit 84-it lastbiilinit aporneqarlutik Nicemi toqutaapput

Inuppassuit Nicep sineriaani katersuussimapput, inuiattut ullorsiortoqarneranut atatillugu qummoroortartoqarnissaanut katersuussimasut saassunneqarlutik.
Lastbiilit inuit tungaannut tassanngaannaq sangupput, inuppassuit tassani aporlugit. Inuit 84-it ajunaarput, allallu 18-it aqqunartitingaatsiartut nalunaarutigineqarluni.

Lastbiilit politiit assersuinerat aqqusaalatoralugit inuit tungaannut ingerlasut videoliakkut takuneqarsinnaavoq, lastbiilit sukkatseriarlutik inuit tungaannut sangoriasaarput, tuluillu aviisiisa ilaata The Guardianip allaaserisaa naapertorlugu sangujoraartutut ingerlapput inuit sapinngisamik amerlasuut aporneqarnissaallusooq ingerlaarlutik.

Hollande: Saassussineq peqqarniisaarniarneruvoq

Aqutsisoq politiinit allaaneqarluni taava toqutaavoq.

Saassussisoq Frankrigimeersuuvoq Tunisiamit kingoqqisoq angut 31-nik ukiulik. Frankrigimi oqartussat taama nalunaaruteqarput, angullu pineqartoq politiinit nalunnginneqareerpoq, peqqarniisaarniartutulli ilisimaneqarani.

Frankrigip præsidentiata Francois Hollandep saassussineq peqqarniisaarniarnertut taavaa, Parisimilu siorna novembarimi saassussisoqarnerata kingorna Frankrigimi sukannersumik aqutsinissaq sivitsoqqillugu.

Nunat assigiinngitsut naalakkersuinikkut siuttui misiginneqatiginninnertik apuuppaat, Danmarkip statsministeria Lars Løkke Rasmussen taakkununnga ilaalluni:

- Taamatut saassussisoqarnera kamannarpoq, maajunnarlunilu alianaqaarlu. Peqqarniisaarniallu akiorniarneqarnissaat sakkortuseriaannarlugu. Avissaartuutsinniarsaraatigut iluatsissanngilaalli, akerlianillu ataatsimoornerulersilluta. Frankrigimiut misiginneqatigaakka, toqutaasullu ilaqutaasa ikinngutaasalu aamma misiginneqatigalugit, Lars Løkke Rasmussen oqarpoq.