Unnuk Kulturisiorfik Inuit 1529-t Kalaallit Københavnimi Illuutaannut alakkaapput
Inuit assigiinngitsorpassuit Kalaallit Illuutaannut alakkaattut, Kalaallit Københavnimi Illuutaanni pisortap tullia Niels Ole Jensen oqarpoq:
- Inuit Kalaallit Nunaannut attuumassuteqanngitsut takkussuupput. Inuit Kalaallit Nunaat pillugu oqaluttuanik tusagaqarsimasut, Kalaallit Nunaallu pillugu paasisaqarnerunissamut unnuk manna periarfissiivoq, Niels Ole Jensen, Kalaalit Københavnimi Illuutaanni unnuk kulturisiorfimmik aaqqissuussinernut 15-inut maannamut peqataasimasoq oqarpoq.
Assigiinngitsunik unnuup ingerlanerani aliikkusersuisoqarpoq. Nipilersoqatigiit Suluit appisimaarput, Nukâka Coster-Waldau Ilannguaq Lumholtilu marloriarlutik tusarnaartitsipput, soorlu aamma erinarsoqatigiit Mik-ikkut erinarsortut. Qilaatersortartoq Gaz Zaa Lung qulleq orsutortoq ikillugu Kalaallit Nunaanni inuuneq pillugu oqaluttuarpoq.
AAMMA ATUARUK Løvstrædemi unnuk kulturisiorfik
Qullip orsutortup Kalaallit Nunaannut pingaaruteqassusaa
Qulleq orsutortoq ukioq manna unnuk kulturisiorfimmi qitiutinneqarpoq.
- Qullip orsutortup Kalaallit Nunaanni pingaaruteqarsimanera oqaluttuarerusupparput, qaamanerup taartarnerullu Kalaallit Nunaanni inuuniarnermi qanoq sunniuteqarnersut oqaluttuarerusullutigu, Lars Lerche, kulturimut tunngasunik sulialik, paasissutissiisartorlu oqarpoq.
Kalaallit Københavnimi Illuutaata matui Løvstrædemi unnukkut nalunaaqutaq arfinermut ammarneqarmata inuppassuit silataani katersuutereersimapput, Unnuk Kulturisiorfimmi tassani misigisassarsioriartorlutik.
Uaajeertoqarpoq inuit tupaallaatigeqisaannik.
AAMMA ATUARUK Københavnimi unnuk kulturisiorfimmi nunarput sammineqalersoq
Eqqumiitsuliaq aakkiartortoq
Eqqumiitsuliortut Rasmus Nielsen David H. Peronárdilu unnuk kulturisiorfimmut atatillugu eqqumiitsuliaminnik Kalaallit Københavnimi Illuutaata silataani saqqummersitsipput.
Naasut assigiinngitsut sikuminermut qeritinneqarsimapput, sikuminerlu kigaatsumik aakkiartuaarluni. Sikup aakkiartornera kingorna filmilianngorlugu takutinneqarpoq.
AAMMA ATUARUK Atisat sermisut qillalaartut Unnuk Kulturisiorfimmi saqqummersinneqassapput
