Atisat sermisut qillalaartut Unnuk Kulturisiorfimmi saqqummersinneqassapput
![](/sites/default/files/styles/image_934x467/public/article_images/pressefoto_model_carmen_kass_fotograf_peter_christian_christensen.jpg?itok=D9jJ3ve7)
Sermip Kunngiata Paniami siunertaavoq, atisanik nutaalianik ilusilersuisartoq isumassarsititaagaangat susoqartarneranik paasiniaaneq. Inuiaqatigiit isumassarsivigisai qanoq sunnerneqassappat, isumassarsiallu saqqummiunneqartut sussappat?
Saqqummersitsineq pilersinneqarpoq qallunaap atisaliortartup Jørgen Simonsenip, Kalaallisuuliornermik Ilinniarfiup Sisimiuniittup, mersortarfiup Kittat, ammeriviup Great Greenlandip, Nunatta Katersugaasiviata aamma NAPA-p suleqatigiinnerisigut.
Inuiaqatigiit suulluunniit kulturikkut oqaluttuarisaanerat ineriartortuaannartuuvoq. Inuiaqatigiinnilu mikinerni soorlu nunatsinni, ineriartornerup nutaaliornikkut nunap avataanut apuuttussamik ersersinneqarnissaa, aamma nunarsuarmut oqaloqatiserinnippalaartumik ingerlanneqarnissaa pingaaruteqarpoq.
Tusagassiuutinut nalunaarummi NAPA taama allappoq.
AAMMA ATUARUK Miss Danmarkimi peqataasoq aalassatsitsisoq
Saqqummersitsineq tarranik tallimanik Jørgen Simonsenimit pilersitanik nutaartaqarpoq.
Atisat Istanbulimi, Nuummi kiisalu Sisimiuni suliaapput. Saniatigut titartakkat siulliit Jørgen Simonsenip suliai Sermip Kunngiata Panianut atatillugu titartagaatai 1998-mi Atisaliorfissuarmi Versaces Haute-Couture kollektionimik taasami saqqummersinneqarsimasut ilaapput.
- Neriuutigaara ataqqinnittumik takunnittussanut inerniliisimallunga, eqquinikkut, tupinnartuliornikkut aqqutissiuinerullu tungaasigut, atisaliortartoq Jørgen Simonsen oqarpoq.
Saqqummersitsineq Nunatta Katersugaasiviani takuneqarsinnaavoq januaarip ulluisa 21-aniit marsip ulluisa 26-iat ilanngullugu.
Nuummi saqqummersitsinerup kingorna Sermip Kunngiata Pania Immikkoortuata aappaa, nunani avannarlerni angalassaaq, ilaatigut Taseralimmi Sisimiuni, Parisimi, Stockholmimi, Islandimi, Savalimmiuni Københavnimi Nordatlantens Bryggemi Saamillu Nunaanni saqqummersinneqassalluni.