Inuiaqatigiinnut akuliutsitsiniarneq iluatsittoq
Suliniummi meeqqat peqataasut 92 procentii inuunerinnerulersimapput allaami inuunerinnerulersimaqisut naliliinermi erserpoq.
- Ilaatigut tunngaviusut ilagaat suliniummi peqataasunut meeqqanut allanut attaveqarlualersimanerat. Meeqqammi uku ilisarnaatigisimavaat ikinnguteqanngitsuuneq, ukiulli sisamat ingerlaneranni pitsaasumik ikinnguteqarnerit aallartissimapput, Sissel Lea Nielsen Foreningen Grønlandske Børnimi allattaanerup tullersortaa oqarpoq.
Et Godt Liv i Danmark suliniutaavoq kalaallit meeqqat inuusuttullu atugarliortut ikiorserniarlugit. Suliniut 2007-mi aallartippoq immikkut suliniarnernut aningaasaliissutinit aningaasaliiffigineqarluni. Aallartinnermi meeqqat peqataasut 100-pput maannalu 60-nngorsimallutik.
Suliniut aallartinngikkallarmat kalaallit meeqqat inuusuttullu isumaginninnermi sulialinnit ilisimaneqarpiarsimanngillat, Sissel Lea Nielsen oqaluttuarpoq.
Suliniutip malitsigisaanik Foreningen Grønlandske Børn isumaginninnermi sulialinnut 89-riarlutik nalunaarutiginnissimapput tamatumalu kinguneranik meeqqat 62-it assigiinngitsutigut ikiorserneqartarput.
- Tassa imaappoq kalaallit meerarpassuit Danmarkimi inooqataasimapput malugineqaratik naak atugarliortuugaluarlutik. Taamaattumik tamanna pissutaasoraara Danmarkimi inuiaqatigiinnit taperserneqarnissaq pisariaqartitartik pissarsiarimmassuk, oqarpoq.