Inuiaqatigiinni kiffartuussineq aqqutissaavoq
Inuiaqatigiinni kiffartuussisussanngortitsilluni pineqatissiisarneq Nunatta eqqartuussiviinit atorneqanngippallaaqaaq. Taama isumaqarpoq Kalaallit Nunaanni pinerluttulerinermik ilisimasalik aamma Namminersorlutik Oqartussani aamma Inatsiseqarnermut ministereqarfimmi siunnersorti Leif Senholt.
- Pinerluttunik Isumaginnittoqarfiup suliniutaannut pitsaasunut aserorterisutut utaqqisitaasarneq isigaara, Leif Senholt KNR-imut taama oqarpoq.
Pinerlussimasunik inuiaqatigiinni kiffartuussisussanngorlugit pineqatissiisarneq, Kalaallit Nunaanni eqqartuussivinnit atugaanerusariaqartoq, Pinerluttunik Isumaginnittoqarfimmi pisortap, Thomas Nicolajsenip sapaatip akunnera kingulleq Radioaviisimut oqaatigaa.
- Pinerlussimasut inuiaqatigiinni kiffartuussisussanngortinneqartarneri Pinerluttunik Isumaginnittoqarfimmit atugaraarput. Suliffeqarfinnillu 30-inik isumaqatigiissuteqarpugut, soorlu utoqqaat illuini, timersortarfinni qatserisartoqarfinni allanilu. Neriuutigisimagaluarparpullu eqqartuunneqartut inuiaqatigiinni kiffartuussinissaminnik pineqaatissinneqartut amerlanerusinnaaneri, tassami tamanna piareersimaffigigatsigu, Pinerluttunik Isumaginnittoqarfimmi pisortaq Thomas Nicolajsen oqarpoq.
Tamannalu ilisimatuumit maanna ilalerneqarpoq.
- Inuiaqatigiinnili kiffartuussisussanngorlugit pineqaatissinneqartartut ikippallaarput, illuatungaanili inissinneqarnissaminnik utaqqisut amerliartuinnarlutik, Leif Senholt taama oqarpoq.
- Suliffeqarfinnut isumaqatigiissusioreersimasunut nuannernavianngilaq pineqaatissinneqarsimasunik tigummisaqarsinnaanerminnut ilinniartinneqareerlutik atorneqartarpiannginneq. Inuiaqatigiinnummi akikinnerussagaluarpoq kiffartuussinissamik pineqaatissiisoqarnerusartuuppat, taamaasillutik pineqaatinneqarsimasut utaqqilussanngikkaluarput, Leif Senholt oqarpoq.
- Tassami pinerlussimasut utaqqisiinnarnagit aammalu inuuneri aserortiinnarnagit taava inuiaqatigiinni kiffartuussisussanngorlugit pineqatissiikkaanni tamanut iluaqutaassagaluarpoq, Leif Senholt oqarpoq.
2011-mut ukiumoortumik nalunaarut, Pinerluttunik Isumaginnittoqarfimmit suliarineqaleruttorpoq, taakkulu oqaatigisinnaanngikkallarnerarpaat qasserpiaat inuiaqatigiinni kiffartuussinissaminnik siorna pineqaatissinneqarsimanersut.
Pinerlussimasut eqqartuunneqareersullu inissinneqarnissaminnik utaqqisut maanna 300-it tungaanut amerlatigisut aaqqiivigineqarallarnissaat ukioq manna pissanngitsoq, Inatsiseqarnermut tunngasunik Naalakkersuisup Anthon Frederiksenip ippassaq Radioaviisimut oqaatigaa.